وزیرِ اعظم شہباز شریف کی نیویارک میں برطانوی ہم منصب سے ملاقات

نیویارک: وزیرِ اعظم پاکستان محمد شہباز شریف نے نیویارک میں برطانوی وزیرِ اعظم سے اہم ملاقات کی، جس میں پاکستان کی موجودہ معاشی صورتحال، عالمی مسائل اور دوطرفہ تعلقات پر تفصیلی تبادلہ خیال کیا گیا۔ملاقات کے دوران وزیرِ اعظم شہباز شریف نے پاکستان کی معاشی استحکام کی کوششوں پر روشنی ڈالتے ہوئے کہا کہ حکومت نے معیشت کو مستحکم کرنے کے بعد ترقی کے لیے کئی اقدامات کیے ہیں، جن میں خاص طور پر فیڈرل بورڈ آف ریونیو (ایف بی آر) میں اصلاحات اور ٹیکس بیس میں توسیع شامل ہے۔ انہوں نے ان اقدامات کو ملک کے اقتصادی مستقبل کے لیے اہم قرار دیا۔

وزیرِ اعظم نے پاکستان کو موسمیاتی تبدیلی کے منفی اثرات کا سامنا کرنے والے ممالک میں سے ایک قرار دیتے ہوئے، اس چیلنج کے حوالے سے بھی برطانوی ہم منصب کو آگاہ کیا اور عالمی تعاون کی ضرورت پر زور دیا۔ انہوں نے اس بات کا بھی اعادہ کیا کہ موسمیاتی تبدیلی جیسے عالمی مسائل سے نمٹنے کے لیے دنیا کو مل کر کام کرنا ہوگا۔شہباز شریف نے پاکستان کی دہشتگردی کے خلاف جنگ میں دی جانے والی قربانیوں کا ذکر کرتے ہوئے کہا کہ دہشتگردی ایک عالمی مسئلہ ہے جس کے خاتمے کے لیے بین الاقوامی برادری کو مشترکہ کوششیں کرنی ہوں گی۔

پاکستان میں سرمایہ کاری کے مواقع پر بات کرتے ہوئے وزیرِ اعظم نے کہا کہ برطانیہ پاکستان میں سرمایہ کاری کرنے والا تیسرا بڑا ملک ہے۔ انہوں نے مزید کہا کہ پاکستان میں مختلف منصوبوں میں سرمایہ کاری کے بے پناہ مواقع موجود ہیں، جو دونوں ممالک کے لیے فائدہ مند ثابت ہو سکتے ہیں۔ملاقات میں وزیرِ اعظم نے برطانیہ میں مقیم پاکستانیوں کے کردار کو سراہا اور دونوں ممالک کی ترقی میں ان کے کردار کو اہم قرار دیا۔ انہوں نے اس بات کا اعادہ کیا کہ پاکستان اور برطانیہ کے درمیان عوامی روابط اور تبادلوں کو فروغ دینا باہمی ترقی کے اہداف کے حصول میں معاون ثابت ہوگا۔