اسلام آباد: وزیراعظم پاکستان محمد شہباز شریف کی زیر صدارت انسانی سمگلنگ کے خلاف اٹھائے گئے اقدامات کا جائزہ لینے کے لیے اجلاس منعقد ہوا۔
اجلاس میں وزارتوں اور اداروں کے اعلیٰ حکام نے ملک میں انسانی سمگلنگ کے خلاف حالیہ کارروائیوں اور قانون سازی کے حوالے سے تفصیلی بریفنگ دی۔وزیراعظم نے اجلاس کے دوران انسانی سمگلنگ میں ملوث سرکاری اہلکاروں کے خلاف ایف آئی اے کی حالیہ تادیبی کارروائیوں کو سراہا۔ ان کا کہنا تھا کہ "یہ اقدام انتہائی اہم ہے اور انسانی سمگلنگ کے نیٹ ورک میں ملوث افراد کے خلاف سخت کارروائیوں کی ضرورت ہے۔”وزیراعظم نے انسانی سمگلروں کے سہولت کار سرکاری افسران کے خلاف حالیہ تادیبی کارروائیوں کو خوش آئند قرار دیتے ہوئے کہا کہ "ان سہولت کاروں کے خلاف مزید سخت تعزیری اقدامات اٹھائے جائیں تاکہ اس مکروہ کاروبار کا خاتمہ کیا جا سکے۔”انہوں نے تمام انسانی سمگلنگ کے گروہوں کے خلاف سخت قانونی کارروائی کی ہدایت دی تاکہ ان سمگلرز کو نشان عبرت بنایا جا سکے۔ وزیراعظم نے یہ بھی کہا کہ "انسانی سمگلروں کی جائیدادوں اور اثاثوں کی ضبطگی کے لیے فوری قانونی کارروائی عمل میں لائی جائے۔”
وزیراعظم نے انسانی سمگلنگ کے حوالے سے استغاثہ کے عمل کو مزید مؤثر بنانے کی ہدایت دی۔ ان کا کہنا تھا کہ "وزارت قانون و انصاف سے مشاورت کے بعد اعلیٰ ترین درجے کے وکلا کو تعینات کیا جائے تاکہ اس معاملے میں کوئی کسر نہ رہ جائے۔”وزیراعظم نے دفتر خارجہ کو ہدایت دی کہ وہ بیرون ملک سے انسانی سمگلنگ میں ملوث پاکستانی شہریوں کے حوالے سے متعلقہ ممالک سے رابطہ کرے اور ان کی پاکستان حوالگی کے لیے جلد از جلد اقدامات اٹھائے۔وزیراعظم نے وزارت اطلاعات و نشریات اور وزارت داخلہ کو ہدایت دی کہ وہ عوام میں بیرون ملک نوکریوں کے لیے صرف قانونی راستوں کی اہمیت کے بارے میں آگاہی مہم چلائیں تاکہ غیر قانونی طریقوں سے بچا جا سکے۔وزیراعظم نے ملک میں ایسے تکنیکی تربیتی اداروں کی ترویج کی ضرورت پر زور دیا جو عصر حاضر کے تقاضوں کے مطابق سرٹیفائیڈ پیشہ ور افراد بیرون ملک بھیج سکیں۔وزیراعظم نے ہوائی اڈوں پر بیرون ملک جانے والے افراد کی سکریننگ کے عمل کو مزید مؤثر بنانے کی ضرورت پر زور دیا تاکہ انسانی سمگلنگ کو روکا جا سکے۔
اجلاس میں وزیر اطلاعات و نشریات عطا اللہ تارڑ، وفاقی وزیر برائے کشمیر و گلگت بلتستان انجینیئر امیر مقام اور دیگر متعلقہ اداروں کے اعلیٰ افسران نے شرکت کی اور وزیراعظم کو انسانی سمگلنگ کے خلاف حالیہ اقدامات اور قانون سازی کی پیشرفت کے بارے میں بریفنگ دی۔وزیراعظم نے اس عزم کا اظہار کیا کہ حکومت انسانی سمگلنگ کے خاتمے کے لیے تمام ضروری اقدامات کرے گی اور اس مکروہ دھندے میں ملوث افراد کے خلاف سخت سے سخت کارروائی کی جائے گی۔
شادی کے اخراجات سے گھبرانے والوں کیلئے حکومت کا بڑا اقدام
یونان کشتی حادثہ،وزیراعظم، وزیر داخلہ،خارجہ کو نوٹس جاری
