راشد منہاس (نشان حیدر) کی 54 ویں برسی پر وزیراعظم شہباز شریف نے اپنے پیغام میں کہا کہ ان کا نام قوم کی تاریخ میں ہمیشہ وفاداری، حوصلے اور فخر کی علامت کے طور پر محفوظ رہے گا۔
وزیراعظم نے کہا کہ راشد منہاس شہید کی 54 ویں برسی پر ان کو تہہ دل سے خراج تحسین پیش کرتے ہیں، ان کی عظیم قربانی ہمت اور فرض سے لگن کی اعلیٰ روایات کی مظہر ہے، 1971 میں آج کے دن پائلٹ آفیسر راشد منہاس نے غیر معمولی عزم کا مظاہرہ کرتے ہوئے پاکستان کی خودمختاری کے تحفظ کے لیے جام شہادت نوش کیاان کا لاجواب جذبہ، وفاداری اور حب الوطنی مسلح افواج اور قوم کے لیے ایک لازوال ترغیب کا باعث ہے ان کی بہادری کی داستان، ہمارے قومی ضمیر کو آزادی کی قیمت اور مادر وطن کے دفاع کے لیے درکار حوصلے کی لازوال یاد دہانی ہے،پائلٹ راشد منہاس شہید کا نام قوم کی تاریخ میں ہمیشہ وفاداری، حوصلے اور فخر کی علامت کے طور پر محفوظ رہے گا۔
پاکستانی مسلح افواج نے پائلٹ آفیسر راشد منہاس شہید (نشانِ حیدر) کے 54ویں یومِ شہادت پر انہیں شاندار خراجِ عقیدت پیش کرتے ہوئے ملک کی خاطر ان کی عظیم قربانی کو فرض شناسی کی اعلیٰ مثال قرار دیا ہے۔
آئی ایس پی آر کے مطابق چیف آف آرمی اسٹاف فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر سدھو نے اس موقع پر کہا کہ پائلٹ آفیسر راشد منہاس کی عظیم قربانی جرات، وفاداری اور فرض شناسی کی اعلیٰ ترین روایات کی علامت ہے۔
آئی ایس پی آر کے مطابق1971ء میں اس دن راشد منہاس نے غیر معمولی حوصلے اور بے مثال ایثار کا مظاہرہ کرتے ہوئے مادرِ وطن کی خودمختاری کے تحفظ کے لیے اپنی جان قربان کر دی تھی، ان کا یہ تاریخی فیصلہ، جس میں انہوں نے سرنڈر کے بجائے شہادت کو ترجیح دی، قوم کے اجتماعی ضمیر کو ہمیشہ روشن رکھے گا، راشد منہاس شہید کی لازوال قربانی اور وطن سے محبت کی مثال مسلح افواج اور پوری قوم کے لیے ہمیشہ مشعلِ راہ رہے گی، مسلح افواج نے اس عزم کا اعادہ کیا کہ وطنِ عزیز کے دفاع کے لیے اسی جذبے اورعزم کے ساتھ اپنی ذمہ داریاں نبھائی جائیں گی، جس کی راہ راشد منہاس نے دکھائی۔
