اسلام آباد: وزیراعظم محمد شہباز شریف نے پاکستان بھر میں مقیم ہندو برادری کو ہولی کے رنگا رنگ اور خوشیوں بھرے تہوار پر دلی مبارکباد پیش کی ہے۔ وزیراعظم نے اپنے خصوصی پیغام میں کہا کہ ہولی کا تہوار نہ صرف بہار کی آمد کا اعلان ہے بلکہ یہ محبت، ہم آہنگی اور اچھائی کی فتح کی علامت بھی ہے۔
اپنے پیغام میں وزیراعظم نے کہا کہ ہولی ایک ایسا تہوار ہے جو معاشرتی اور ثقافتی رنگوں سے بھرپور ہے اور یہ ہمیں نئی شروعات اور تعلقات کی تجدید کا درس دیتا ہے۔ انہوں نے کہا کہ اس موقع پر ہمیں ایک مضبوط اور متحد قوم کی تعمیر کے عزم کو دہرانا چاہیے، جہاں ہر شہری کو برابری کے حقوق حاصل ہوں اور سب مل کر قومی ترقی میں اپنا کردار ادا کریں۔
وزیراعظم شہباز شریف نے مزید کہا کہ یہ تہوار تمام پاکستانیوں کے لیے باہمی احترام، رواداری اور یکجہتی کے فروغ کا موقع فراہم کرتا ہے۔ انہوں نے دعا کی کہ رنگوں کا یہ تہوار ہندو برادری کی زندگیوں میں خوشیوں، صحت، کامیابیوں اور خوشحالی کا باعث بنے۔
پاکستان میں بسنے والی ہندو برادری ہر سال جوش و خروش سے ہولی کا تہوار مناتی ہے، جس میں ایک دوسرے پر رنگ پھینکنے، خصوصی دعاؤں اور روایتی پکوانوں کے ساتھ خوشیوں کا تبادلہ کیا جاتا ہے۔ اس موقع پر ملک کے مختلف شہروں میں تقریبات منعقد کی جاتی ہیں جہاں تمام مذاہب اور برادریوں کے لوگ یکجہتی کا اظہار کرتے ہیں۔وزیراعظم کی جانب سے یہ پیغام بین المذاہب ہم آہنگی اور قومی یکجہتی کے فروغ کے عزم کی ایک کڑی ہے، جو پاکستان کو ایک ترقی یافتہ اور روشن خیال ملک بنانے میں معاون ثابت ہو سکتا ہے۔
