وزیر اعظم سے تاجر برادری کی کراچی پورٹ ٹرسٹ میں ملاقات ،انفرا سٹرکچر کو بہتر بنانے کا مطالبہ

وزیر اعظم سے تاجر برادری کی کراچی پورٹ ٹرسٹ میں ملاقات ہوئی، بندرگاہ پر درپیش مشکلات اور شپنگ لائنز کی زیادتیوں بارے آگاہ کیا۔ وزیراعظم سے تاجروں نے گفتگو کرتے ہوئے کہا کہ بجلی سستی ہوگی تو برآمدات کو 6 ارب ڈالر تک بڑھا دیں گے، ایکسپورٹ بڑھے گی تو بیرونی قرض کی ضرورت نہیں ہوگی، ایکسپورٹرز پر فکسڈ ٹیکس ختم کرنے پر تحفظات سے بھی شہباز شریف کو آگاہ کیا۔تاجروں نے وزیر اعظم سے پورٹ کے انفرا سٹرکچر کو بہتر بنانے کا مطالبہ کر دیا، وزیراعظم نے پورٹ پر کلیئرنس میں تاخیر پر برہمی کا اظہار کیا، متعلقہ اداروں کو پورٹ پر درپیش مسائل جلد حل کرنے کی ہدایت کی۔وزیر اعظم نے اگلے ہفتے ایف پی سی سی آئی سے پورٹ پر بہتری کیلئے تجاویز مانگ لیں۔قائم مقام صدرایف پی سی سی آئی ثاقب فیاض مگوں کا کہنا تھا کہ وزیر اعظم کو پورٹ پر پیش آنے والی مشکلات سے آگاہ کیا ہے اور پورٹ کے انفرا اسٹرکچر کو بہترکرنے کے بارےمیں کہا ہے۔ثاقب فیاض کا کہنا تھا کہ وزیر اعظم نے پورٹ پر کلیئرنس میں تاخیر پر برہمی کا اظہارکیا اور کلیئرنس جلد کرنے کے لیے اسکینرز فوری لگانے کی ہدایت کی ہے۔وزیراعظم نے اگلے ہفتے ایف پی سی سی آئی سے پورٹ پر بہتری کے لیےتجاویز بھی طلب کرلیں۔