سابق وزیر خزانہ اور مسلم لیگ ن کے رہنماء اسحاق ڈار کا کہنا ہے کہ ہماری جماعت کے بارے میں تقسیم کی خبریں بے بنیاد ہیں۔
انہوں نے اپنے سوشل میڈیا پیغام میں کہا: مسلم لیگ (نواز) میں کسی قسم کی کوئی تقسیم نہیں نہ ہی ایسی کوئی بات ہے۔
https://twitter.com/MIshaqDar50/status/1546209079508574209
انہوں نے مزید کہا: ہماری جماعت پہلے بھی میاں نواز شریف کی قیادت اور میاں شہباز شریف کی صدارت میں متحد تھی اور آگے بھی ہمیشہ متحد رہے گی۔
انکے مطابق: موجودہ اقتصادی ٹیم پر حکومت کی تشکیل کے صرف 3 ماہ بعد تنقید کرنے والے یہ مت بھولیں کہ عمران خان کی نااہل حکومت معیشت کو تباہ کرکے ملک کو کن مشکل چیلنجز میں جھونک کرگئی۔
اسحاق ڈار کہتے ہیں: میاں نواز شریف کی وزارت عظمی میں مہنگائی %4 (کھانے کی اشیاء %2) جی ڈی پی %6،شرح سود %5.25،جنوبی ایشیاء کی مستحکم ترین کرنسی اور سب سے بہترین کارکردگی والا اسٹاک ایکسچینج تھا۔
وہ دعوی کرتے ہیں کہ: اس سب کی بنیاد پر پاکستان کو مستقبل کی 18ویں بڑی معیشت کا عندیہ ملا اور ان تمام کامیابیوں کو عمران خان نے 43 مہینوں میں نیست و نابود کر دیا۔
انہوں نے قوم کو یقین دہانی کرائی کہ: پاکستان مسلم لیگ نواز نے پہلے بھی ملک کو مشکل ترین حالات سے نکال کر ترقی کی راہ پر گامزن کیا تھا اور اس بار بھی انشاءاللہ قوم کو مایوس نہیں کرے گی۔
