ممتاز حیدر
مرکزی مسلم لیگ کے صدر خالد مسعود سندھو نے بنوں کینٹ میں سیکورٹی فورسز کی جانب سے دہشت گردوں کی کارروائی کو ناکام بنانے پر انہیں زبردست خراج تحسین پیش کیا۔ ان کا کہنا تھا کہ سیکورٹی فورسز نے جرات اور بہادری کا مظاہرہ کرتے ہوئے چھ دہشت گردوں کو ہلاک کر کے ملک دشمن عناصر کے ناپاک عزائم کو خاک میں ملا دیا، جو کہ ایک بڑی کامیابی ہے۔
مرکزی مسلم لیگ کے صدر نے اس افسوسناک واقعے میں دھماکے کے نتیجے میں ایک گھر کی چھت گرنے سے جاں بحق ہونے والے افراد کے اہل خانہ سے دلی ہمدردی اور تعزیت کا اظہار کیا۔ انہوں نے کہا کہ دہشت گردوں اور ان کے سہولت کاروں کے خلاف بلا تفریق سخت اور بھرپور کارروائی ہونی چاہیے تاکہ ملک میں امن و امان کو یقینی بنایا جا سکے۔
خالد مسعود سندھو نے مزید کہا کہ پاکستان میں دیرپا امن کے قیام کے لیے تمام محب وطن قوتوں کو یکجا ہونا ہوگا . انہوں نے سیکورٹی فورسز کے بہادر جوانوں کی بہادری کو سراہتے ہوئے کہا کہ وہ ملک و قوم کے تحفظ کے لیے اپنی جانوں کا نذرانہ پیش کر رہے ہیں اور پوری قوم ان کے ساتھ کھڑی ہے۔انہوں نے کہا کہ دہشت گردی کے خلاف جنگ میں پوری قوم سیکورٹی فورسز کے شانہ بشانہ کھڑی ہے اور کسی بھی قربانی سے دریغ نہیں کرے گی۔ ملک دشمن عناصر کے خلاف کارروائیاں مزید تیز کی جانی چاہئیں تاکہ پاکستان کو ایک محفوظ اور مستحکم ملک بنایا جا سکے
