لاہور (باغی ٹی وی) یوم آزادی کے موقع پر پاکستان مرکزی مسلم لیگ لاہور کے زیر اہتمام ایک شاندار ‘پہلا آزادی کارواں’ نکالا گیا، جس میں ہزاروں افراد نے شرکت کر کے اپنے قومی جذبے کا بھرپور اظہار کیا۔
کارواں کا آغاز بیگم کوٹ سے ہوا اور یہ شاہدرہ، بادامی باغ، راوی روڈ اور بھاٹی چوک سے ہوتا ہوا ریلوے اسٹیشن لاہور پر اختتام پذیر ہوا۔ کارواں کے راستے میں جگہ جگہ شہریوں نے استقبالیہ کیمپ لگا کر شرکاء پر پھولوں کی پتیاں نچھاور کیں اور ان کا والہانہ استقبال کیا۔ فضا "پاکستان زندہ باد” اور "مرکزی مسلم لیگ پائندہ باد” کے پرجوش نعروں سے گونجتی رہی۔
قیادت اور مرکزی رہنماؤں کی شرکت
کارواں کی قیادت پاکستان مرکزی مسلم لیگ لاہور کے صدر انجینئر عادل خلیق نے کی۔ اس موقع پر مرکزی رہنماؤں میں قاری یعقوب شیخ، ڈاکٹر مزمل اقبال ہاشمی (جنرل سیکرٹری لاہور)، چوہدری معاذ اشتیاق (سٹی صدر)، عمر فاروق گجر، اور عمر عبد العزیز بھی موجود تھے۔
پاکستان کی نظریاتی سرحدوں کا تحفظ ہمارا اولین مقصد: انجینئر عادل خلیق
انجینئر عادل خلیق نے شرکاء سے خطاب کرتے ہوئے کہا کہ "پاکستان مرکزی مسلم لیگ پاکستان کی نظریاتی سرحدوں کی محافظ ہے۔ ہم اس 78ویں یوم آزادی کو حقیقی قومی جذبے کے ساتھ منانے کے لیے نکلے ہیں۔” انہوں نے کہا کہ آج کا دن ہماری نسلوں میں ایک نئی روح پھونک رہا ہے۔ انہوں نے مزید کہا کہ جس جرات سے پاکستان نے دشمن کو ناک رگڑوائی ہے، وہ تاریخ میں سنہری حروف سے لکھی جائے گی۔ ان کا کہنا تھا کہ 1971ء کا بدلہ چکاکر بھارت کی بدمعاشی کو لگام ڈالی گئی ہے۔
ڈاکٹر مزمل اقبال ہاشمی نے کہا کہ "آزادی کوئی تحفہ نہیں، یہ بے شمار قربانیوں کا ثمر ہے۔” انہوں نے نوجوان نسل کو یہ پیغام دیا کہ پاکستان کی سالمیت، خودمختاری اور نظریاتی تشخص کے تحفظ کے لیے مرکزی مسلم لیگ ہمیشہ صفِ اول میں رہے گی۔ انہوں نے مزید کہا کہ "ہماری سیاست اقتدار کی نہیں بلکہ اقدار کی سیاست ہے، اور ہمارا مشن نوجوانوں کو مایوسی سے نکال کر امید، وحدت اور عمل کے راستے پر گامزن کرنا ہے۔”
