ڈیرہ غازی خان (باغی ٹی وی، نیوز رپورٹر شاہد خان)آم کو زبردستی پکانے کے لیے ممنوعہ کیمیکل کیلشیم کاربائیڈ کے خلاف پنجاب فوڈ اتھارٹی کی بھرپور کارروائی، ڈائریکٹر آپریشنز شہزاد مگسی کی سربراہی میں 216 مقامات پر انسپکشن کی گئی، جہاں سے 117 کلو کاربائیڈ اور 95 کلو آم ضبط کر کے موقع پر تلف کر دیے گئے۔
انسپکشن کے دوران فروٹ منڈیوں، باغات اور پھل بردار گاڑیوں کو چیک کیا گیا۔ زہریلے کیمیکل کے استعمال پر 94 ہزار روپے کے جرمانے بھی عائد کیے گئے۔
ترجمان کے مطابق یہ آپریشن ڈائریکٹر جنرل پنجاب فوڈ اتھارٹی محمد عاصم جاوید کی خصوصی ہدایت پر کیا گیا تاکہ عوام تک محفوظ اور صحت بخش خوراک پہنچائی جا سکے۔
ڈی جی فوڈ اتھارٹی نے کہا کہ آموں کو کیلشیم کاربائیڈ سے پکانا قانونی اور انسانی صحت کے خلاف جرم ہے۔ ان کا کہنا تھا کہ زہریلے آم کینسر، معدے، گردے اور اعصابی بیماریوں کا سبب بن سکتے ہیں، اس لیے خلاف ورزی پر زیرو ٹالرنس پالیسی کے تحت سخت کارروائی کی جائے گی۔
انہوں نے تاجروں اور باغبانوں کو خبردار کیا کہ قدرتی طریقے سے آموں کو پکانے کی روایت کو اپنایا جائے، ورنہ قانونی کارروائی سے گریز ممکن نہیں ہوگا۔
