ڈیرہ غازی خان،باغی ٹی وی (سٹی رپورٹرجواداکبر) پولیس مقابلے میں خطرناک ڈاکو ہلاک، ایس ایچ او زخمی
ڈیرہ غازی خان کے تھانہ کالا کی حدود میں پولیس مقابلے کے دوران مطلوب ڈاکو حق نواز ہلاک ہو گیا، جبکہ ایس ایچ او طاہر سلیم فائرنگ کے تبادلے میں زخمی ہو گئے۔
ایس ایچ او طاہر سلیم اپنی پولیس پارٹی کے ہمراہ موضع بیٹ شادن میں ملزمان کی گرفتاری کے لیے پہنچے، جہاں ملزمان نے پولیس پر اندھا دھند فائرنگ کر دی۔ ایک گولی ایس ایچ او کے دائیں کندھے پر لگی تاہم ان کی حالت خطرے سے باہر ہے۔
ہلاک ہونے والے ملزم حق نواز قتل، اقدامِ قتل، اور ڈکیتی جیسے سنگین جرائم میں مطلوب تھا۔ دیگر ملزمان کی گرفتاری کے لیے سرچ آپریشن جاری ہے۔
ڈی پی او ڈیرہ غازی خان سید علی نے موقع پر پہنچ کر کارروائی کی نگرانی کی اور زخمی ایس ایچ او کی عیادت کرتے ہوئے ان کی بہادری کو سراہا۔ پولیس حکام کے مطابق عوام کی جان و مال کا تحفظ ان کی اولین ترجیح ہے۔
