نواب شاہ : تھانہ بچل پور پولیس نے لاکھوں روپے مالیت کے سگریٹ سے بھرا ٹرک ڈرائیور سمیت اغوا کر لیا۔
باغی ٹی وی: ایس ایس پی شہید بینظیر آباد تنویر تنیو نے واردات کا نوٹس لیتے ہوئے ایس ایچ او تھانہ بچل پور صادق وگن، ہیڈ محرر ماجد میر جت، ہیڈ کانسٹیبل شیر محمد سرگانی کے خلاف تعلقہ تھانہ نواب شاہ میں مقدمہ درج کر لیا،ایس ایس پی تنویر تنیو نے بتایا کہ مقدمے میں نامزد دو ملزمان کو گرفتار کرلیا گیا ہے جبکہ ملزم ایس ایچ او فرار ہو گیا ہے مقدمہ ٹرک ڈرائیور صاحبزادہ ولد شہزادہ کی مدعیت میں درج کیا گیا ہے، مقدمے میں اغوا اور ڈکیتی کی دفعات شامل کی گئی ہیں،واردات میں ملوث محکمے کے ایس ایچ او، ہیڈ محرر اور ہیڈ کانسٹیبل کے خلاف محکمہ جاتی کارروائی کی جائے گی۔
دوسری جانب کراچی میں دن دہاڑے پولیس یونیفارم پہنے ڈاکوؤں نے شہری سے ہزاروں ڈالر چھین لئے ڈکیتی کا یہ واقعہ شارع پاکستان پر واٹر پمپ کے قریب سپر اسٹور کے سامنے پیش آیا تجمل حسین نامی شہری منی چینجر سے ڈالر لے کر نکلا تھا کہ اسے لوٹ لیا گیا۔
واقعے کی سی سی ٹی وی فوٹیج میں ملزمان کو شہری کو روکتے اور بات چیت کرتے دیکھا جاسکتا ہے، تھوڑی دیر میں ملزم رقم چھین کر گاڑی میں بیٹھ کر فرار ہوجاتے ہیں فوٹیج میں شہری کو ملزموں کی کار کے پیچھے بھاگتے دیکھا جاسکتا ہے-
