سیاسی جماعتوں کو عام انتخابات میں لیول پلیئنگ فیلڈ فراہم کیا جائے ،الیکشن کمیشن کا خط

الیکشن کمیشن کا نگران وزیراعظم کے پرنسپل سیکرٹری اور چاروں صوبائی چیف سیکرٹریز کو خط،سیاسی جماعتوں کو عام انتخابات میں لیول پلیئنگ فیلڈ فراہم کرنے کی ہدایت کر دی ۔ ایڈیشنل ڈائریکٹر جنرل الیکشن سید ندیم حیدر کی جانب سے خط لکھا گیا سیاسی جماعت نے لیول پلینگ فیلڈ نہ ملنے سے متعلق الیکشن کمیشن کے سامنے تحفظات کا اظہار کیا ہے۔ خط کے متن کے مطابق سیاسی جماعت نے کمیشن کے سامنے کہا کہ نگران حکومتیں لیول پلینگ فیلڈ مہیا نہیں کر رہیں۔ جس سے ان کی مہم اور ووٹرز بری طرح متاثر ہو رہے ہیں۔ سیاسی جماعت نے الیکشن کمیشن سے ملاقات کر کے اپنے خدشات کا اظہار کیا اور لیول پلینگ فیلڈ کا مطالبہ کیا۔
خط کے متن کے مطابق کمیشن کو سیاسی جماعت نے برابری کی بنیاد پر الیکشن مہم چلانے دینے کا کہا ہے۔ نگران حکومتوں کی جانب سے ایک سیاسی جماعت کے ساتھ غیر امتیازی سلوک بند کرنے کا مطالبہ کیا گیا۔الیکشن کمیشن کاکہنا ہے کہ آئین و قانون کے تحت نگران حکومتوں کی ذمہ دای ہے کہ وہ غیر جانبداری کا مظاہرہ کریں۔ چیف سیکرٹریز ڈی سیز اور ڈی پی اوز کو لیول پلینگ فیلڈ سے متعلق ہدایات پر عملدرآمد یقینی بنانے کا حکم دیں۔ تحریک انصاف کے رہنماؤں نے لیول پلینگ فیلڈ کے لیے الیکشن کمیشن سے ملاقات کی تھی۔