ویٹیکن نے اعلان کیا ہے کہ کیتھولک عیسائیوں کے مذہبی پیشوا، پوپ فرانسس کو ڈبل نمونیا کی تشخیص ہوئی ہے۔ ویٹیکن کے مطابق، پوپ فرانسس ہوش میں ہیں اور انہوں نے آج صبح ناشتہ بھی کیا ہے۔ حکام نے بتایا کہ پوپ کے خون کے مختلف ٹیسٹ کیے گئے ہیں، جن کے نتائج سے ان کی حالت میں معمولی بہتری آئی ہے۔
ویٹیکن حکام کا کہنا ہے کہ پوپ فرانسس کی صحت کی نگرانی کی جا رہی ہے اور ان کا علاج جاری ہے۔ دوسری طرف، آج اٹلی کی وزیر اعظم جارجیا میلونی نے بھی اسپتال جا کر پوپ فرانسس کی عیادت کی۔ اس موقع پر میڈیا سے بات کرتے ہوئے اطالوی وزیر اعظم نے کہا کہ پوپ فرانسس ہشاش بشاش تھے اور ان کی حالت میں سدھار آ رہا ہے۔
یاد رہے کہ 88 سالہ پوپ فرانسس سانس لینے میں مشکلات کی شکایت پر 14 فروری کو روم کے ایک اسپتال میں داخل ہوئے تھے۔ ان کے علاج کے حوالے سے ویٹیکن کی جانب سے مسلسل اپڈیٹس دی جا رہی ہیں۔
