پنجاب پراونشل کوآپریٹو بینک نے زرعی قرضہ جات کی فراہمی کا آغاز کردیا

کاشتکار فصلات ربیع کیلئے آسان شرائط پر قرضے حاصل کرکے سرسبز انقلاب لانے میں اپنا کردار ادا کریں، ترجمان پنجاب پراونشل کوآپریٹو بینک

فیصل آباد۔ کاشتکار فصلات ربیع کیلئے آسان شرائط پر قرضے حاصل کرکے غذائی خود کفالت سمیت سرسبز انقلاب لانے میں اپنا کردار ادا کرسکتے ہیں لہٰذا انہیں چاہیے کہ وہ پنجاب پراونشل کوآپریٹو بینک کی قرضوں کی سہولت سے بھر پور استفادہ کریں تاکہ فصلات ربیع کی زیادہ سے زیادہ کاشت ممکن ہو سکے۔ پنجاب پراونشل کوآپریٹو بینک فیصل آباد ریجن کے ترجمان نے بتایاکہ انہوں نے چھوٹے کاشتکاروں کو فصلات ربیع کیلئے قرضو ں کی فراہمی کا آغاز کر دیاہے اور امداد باہمی کی تنظیموں اور ان کے ممبرا ن چھوٹے کاشتکاروں کو آسان شرائط پر صوبہ بھر کے تما م شہروں میں موجود پنجاب پراونشل کوآپریٹو بینکوں کی برانچز سے زرعی قرضے فراہم کئے جا رہے ہیں لہٰذا جو کاشتکار فصلات ربیع کیلئے قرضے حاصل کرنا چاہتے ہوں وہ فوری طور پر بینک کی قریبی شاخ سے رابطہ کر سکتے ہیں۔ انہوں نے بتایاکہ بینک ہر سال فصلات ربیع اور خریف کیلئے اربوں روپے کے قرضے جاری کر رہاہے تاکہ صوبہ میں سر سبز زرعی انقلاب لاکر غذائی خود کفالت کاخواب شرمندہ تعبیر کیاجاسکے۔ انہوں نے بتایاکہ صوبہ بھر میں بینک کی تمام برانچز کے منیجرز اور دیگر سٹاف کو سختی سے ہدایت کی گئی ہے کہ وہ چھوٹے کاشتکار وں کو بروقت قرضوں کی فراہمی کیلئے بھر پور اقدامات کریں۔ انہوں نے کہاکہ اس ضمن میں کسی قسم کی غفلت یاکوتاہی برداشت نہیں کی جائے گی۔ انہوں نے فصلات خریف کیلئے قرضے حاصل کرنے والے کاشتکاروں سے بھی اپیل کی کہ وہ اپنے بقایاجات بروقت ادا کر دیں تاکہ انہیں نئے سرے سے فصلات ربیع کیلئے زیادہ سے زیادہ قرضوں کی فراہمی یقینی بنائی جاسکے۔