تنگوانی،باغی ٹی وی (نامہ نگارمنصور بلوچ) پاکستان تحریک انصاف (پی ٹی آئی) کے رہنما حلیم عادل شیخ نے تنگوانی شہر میں ایک ریلی سے خطاب کرتے ہوئے پیپلز پارٹی پر شدید تنقید کرتے ہوئے کہا کہ انہوں نے سندھ کو تباہ کر دیا ہے۔ انہوں نے کہا کہ پیپلز پارٹی کی حکومت میں بدامنی عروج پر ہے اور کوئی بھی شہری محفوظ نہیں۔ ڈاکوؤں کا راج ہے اور سندھ حکومت ان کی سرپرستی کر رہی ہے۔
حلیم عادل شیخ نے مزید کہا کہ یہاں کے وڈیرے، سردار، پولیس اور ڈاکو ایک پیج پر کام کر رہے ہیں۔ انہوں نے سندھو دریا سے نہریں نکالنے کے منصوبے کو سندھ کے ساتھ ناانصافی قرار دیتے ہوئے کہا کہ پیپلز پارٹی ایک سازش کے تحت سندھو دریا سے نہریں نکال کر سندھ کی زمینوں کو بنجر بنانا چاہتی ہے۔
انہوں نے کہا کہ پی ٹی آئی کی حکومت آتے ہی سندھ کا وزیراعلی پی ٹی آئی کا ہوگا اور ہماری حکومت آتے ہی بدامنی ختم کریں گے اور سندھ سے نہریں نکالنے والا منصوبہ ختم کریں گے۔
اس سے قبل ریلی سے پی ٹی آئی کے رہنما اقبال احمد بجارانی، شیر خان کھوسو اور دیگر رہنماؤں نے بھی خطاب کیا۔
