پاکستان پیپلز پارٹی کی نائب صدر اور سینیٹر شیری رحمان نے پارٹی کے 58ویں یومِ تاسیس کے موقع پر پارٹی قیادت، کارکنان اور سپورٹرز کو مبارکباد پیش کرتے ہوئے کہا ہے کہ آج کا دن بھٹوازم کے نظریے کی تجدید کا دن ہے اور یہی نظریہ پاکستان کی مضبوطی کا ضامن ہے۔
شیری رحمان نے اپنے پیغام میں کہا کہ قائدِ عوام ذوالفقار علی بھٹو شہید نے جمہوری، خوشحال اور پرامن پاکستان کے قیام کیلئے پیپلز پارٹی کی بنیاد رکھی۔ ان کے مطابق پیپلز پارٹی ہمیشہ سے آئین، جمہوریت، انسانی حقوق اور مساوات کی علمبردار رہی ہے،گزشتہ 58 برسوں میں پارٹی کے اقدامات نے پاکستان کو ایک نیا رخ اور مقام دیا۔ آئینِ پاکستان کی بحالی، نیوکلیئر پروگرام، زرعی اصلاحات، آزاد خارجہ پالیسی، میزائل ٹیکنالوجی، بنیادی حقوق، بی آئی ایس پی، اور سی پیک جیسے اقدامات پارٹی کی جدوجہد کے سنگِ میل ہیں۔
شیری رحمان نے کہا کہ شہید ذوالفقار علی بھٹو نے سقوطِ ڈھاکہ کے بعد قوم کو متحد رکھا اور قومی قیادت فراہم کی، جبکہ شہید محترمہ بینظیر بھٹو نے آمریت کے دور میں پرامن جدوجہد کرتے ہوئے صوبوں کو جوڑنے کا کردار ادا کیا۔
ان کا کہنا تھا کہ پیپلز پارٹی نے ہمیشہ عدم تشدد کی سیاست کو فروغ دیا ہے اور ہر مشکل گھڑی میں ملک کو بحرانوں سے نکالا ہے،بھارت کے ساتھ بیانیہ کی حالیہ جنگ میں بلاول بھٹو زرداری نے عالمی سطح پر پاکستان کا وقار بلند کیا۔ پارٹی ہر قسم کی شدت پسندی کی مزاحمت کرتی رہے گی، جبکہ امن، مساوات، عوام کی خوشحالی اور قومی مفادات کا تحفظ پیپلز پارٹی کا بنیادی مشن ہے، پیپلز پارٹی عوام، جمہوریت اور صوبوں کی مضبوطی کو اپنی مضبوطی سمجھتی ہے، جبکہ شہید بھٹو اور شہید محترمہ بینظیر بھٹو کی پارٹی کے اصل وارث عوام ہیں۔
شیری رحمان نے اس بات پر زور دیا کہ پیپلز پارٹی اپنے نظریے پر ہمیشہ ثابت قدم رہی ہے اور استحصالی قوتوں کی شکست تک جدوجہد جاری رہے گی۔ان کا کہنا تھا کہ جمہوریت کو کمزور کرنے والی سوچ کے خلاف پارٹی کی لڑائی جاری رہے گی اور شدت پسندی کی ہر شکل میں مزاحمت کی جائے گی۔انہوں نے کہا کہ بھٹوازم کے نظریے کے تحت آئین کی بحالی، سیاسی اصلاحات، عسکریت پسندی کے خلاف جدوجہد اور غربت میں کمی جیسے بڑے فیصلے ممکن ہوئے۔غیر مسلم اور کمزور طبقات کو مذہب کے نام پر نشانہ بنانے کی اجازت نہیں دی جائے گی۔ پارٹی قیادت، عہدیداران اور جیالے اپنے عظیم مقصد کے لیے مسلسل محنت کیلئے تیار ہیں، جبکہ کارکنوں کی قربانیوں سے جمہوریت آج بھی قائم و دائم ہے اور آگے بڑھ رہی ہے۔
