اسلام آباد (باغی ٹی وی رپورٹ)پری مون سون بارشوں کی آمد، 20 سے 24 جون کے دوران ملک بھر میں گرج چمک، ژالہ باری اور اربن فلڈنگ کا خدشہ
ملک میں جاری شدید گرمی کی لہر کے بعد محکمہ موسمیات نے 20 سے 24 جون کے دوران وقفے وقفے سے پری مون سون بارشوں کی پیشگوئی جاری کر دی ہے۔ محکمہ موسمیات کے مطابق خلیج بنگال اور بحیرہ عرب سے مرطوب ہوائیں ملک کے بالائی اور وسطی علاقوں میں داخل ہو رہی ہیں، جب کہ مغربی ہواؤں کا ایک طاقتور سلسلہ بھی 20 جون سے ملک کے شمالی حصوں کو اپنی لپیٹ میں لے گا۔ ان موسمی تبدیلیوں کے باعث ملک کے مختلف حصوں میں تیز آندھی، گرج چمک، موسلادھار بارش اور بعض مقامات پر ژالہ باری کا امکان ظاہر کیا گیا ہے۔
محکمہ موسمیات کے مطابق 20 سے 23 جون کے دوران کشمیر، گلگت بلتستان، مری، گلیات، اسلام آباد، راولپنڈی، لاہور، گوجرانوالہ، سیالکوٹ، میانوالی، سرگودھا، فیصل آباد، جھنگ، ٹوبہ ٹیک سنگھ، ہری پور، ایبٹ آباد، مانسہرہ، چترال، دیر، سوات، کوہستان، پشاور، مردان، بنوں، کرک، ڈی آئی خان، وزیرستان اور دیگر متعدد علاقوں میں گرج چمک، آندھی اور بارش کی پیشگوئی کی گئی ہے۔ اس دوران چند مقامات پر ژالہ باری بھی ہو سکتی ہے، جو فصلوں کو نقصان پہنچا سکتی ہے۔
مزید برآں 21 سے 23 جون کے دوران جنوبی پنجاب اور شمال مشرقی بلوچستان کے علاقوں، جن میں ژوب، بارکھان، قلات، موسیٰ خیل، ڈیرہ غازی خان، ملتان، بہاولپور، بہاولنگر اور ساہیوال شامل ہیں، میں بھی آندھی کے ساتھ بارش کا امکان ہے۔ جبکہ 22 سے 24 جون کے دوران سندھ کے شہر سکھر، لاڑکانہ، دادو اور جیکب آباد میں بھی گرج چمک اور آندھی کے ساتھ بارش متوقع ہے۔
محکمہ موسمیات نے شہریوں، مسافروں اور سیاحوں کو خبردار کیا ہے کہ وہ خراب موسم کے دوران غیر ضروری سفر سے گریز کریں۔ اسلام آباد، راولپنڈی، لاہور اور گوجرانوالہ جیسے بڑے شہری مراکز میں اربن فلڈنگ کا خدشہ ظاہر کیا گیا ہے، جو نشیبی علاقوں کے لیے خطرہ بن سکتا ہے۔ اس کے علاوہ آندھی اور تیز بارش کے باعث بجلی کے کھمبوں، درختوں، سولر پینلز، گاڑیوں اور دیگر کمزور ڈھانچوں کو نقصان پہنچنے کا خدشہ ہے۔
محکمہ موسمیات کے مطابق اس موسمی سلسلے سے موجودہ شدید گرمی میں عارضی کمی آنے کا امکان ہے، جس سے درجہ حرارت میں کچھ حد تک سکون آئے گا۔ کاشتکاروں کو مشورہ دیا گیا ہے کہ وہ اپنی زرعی سرگرمیوں کو موسمی حالات کے مطابق ترتیب دیں تاکہ ممکنہ نقصانات سے بچا جا سکے۔
محکمہ موسمیات اور دیگر متعلقہ اداروں نے تمام اضلاع میں ایمرجنسی الرٹ جاری کرتے ہوئے انتظامیہ کو ہدایت دی ہے کہ وہ کسی بھی ہنگامی صورتحال سے نمٹنے کے لیے پیشگی انتظامات مکمل رکھیں۔ عوام الناس سے بھی اپیل کی گئی ہے کہ وہ حکومتی ہدایات پر عمل کریں اور غیر ضروری نقل و حرکت سے گریز کریں۔
