اسلام آباد:صدر مملکت ڈاکٹر عارف علوی اور وزیر اعظم شہباز شریف نے بلوچستان میں دہشتگردوں کے حملے میں 4 سکیورٹی اہلکاروں کی شہادت کی شدید مذمت کی ہے۔
پاکستان میں ایرانی سرحدوں سے دہشت گردی کے خلاف ڈاکٹر عارف علوی نے اپنے مذمتی بیان میں کہا کہ پنجگور میں سکیورٹی فورسز پر دہشت گرد حملے کی شدید مذمت کرتا ہوں اور سکیورٹی فورسز کے 4 اہلکاروں کی شہادت پر گہرا دکھ ہے، حملے سے دہشتگردی کے خلاف قوم کے غیر متزلزل عزم کو نقصان نہیں پہنچ سکتا۔
صدر مملکت نے شہداء کی خدمات اور وطن کیلئے عظیم قربانی پر خراج عقیدت اور بہادری پر اُنہیں سلام پیش کیا، اس کے علاوہ انہوں نے شہداء کے بلند درجات کی دعا کی اور ان کے لواحقین سے ہمدردی کا اظہار کیا۔
I strongly condemn killing of our 4 security officials in a terrorist incident along Pakistan-Iran border in Balochistan. Nation pays homage to the sacrifices of their martyred soldiers in line of duty. We expect Iran will ensure that its soil is not used for cross border attacks
— Shehbaz Sharif (@CMShehbaz) January 18, 2023
سماجی رابطے کی ویب سائٹ ٹوئٹر پر اپنے مذمت بیان میں وزیر اعظم شہباز شریف نے کہا کہ بلوچستان میں پاکستان ایران سرحد پر دہشت گردی کے نتیجے میں 4 سکیورٹی اہلکاروں کی شہادت پر شدید مذمت کرتا ہوں۔
وزیراعظم نے مزید کہا قوم فرض کی ادائیگی میں شہید سکیورٹی اہلکاروں کی قربانیوں کو خراج عقیدت پیش کرتی ہے، ہم امید کرتے ہیں کہ ایران اس بات کو یقینی بنائے گا کہ اس کی سرزمین سرحد پار حملوں کیلئے استعمال نہ ہو۔
یادر ہےکہ بلوچستان کے ضلع پنجگور میں دہشت گردوں نے ایران کی حدود سے حملہ کر کے 4 سکیورٹی اہلکاروں کو شہید کر دیا۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ واقعہ پاک ایران بارڈر کے چکاب سیکٹر پر میں پیش آیا جہاں دہشت گردوں نے ایرانی سر زمین سے سکیورٹی فورسز کو نشانہ بنایا۔
آئی ایس پی آر کے مطابق سکیورٹی فورسز کے قافلے کو بارڈر پر گشت کے دوران نشانہ بنایا گیا، حملے میں پاک فوج کے 4 جوان شہید ہوئے، ایران سے حملے میں ملوث دہشت گردوں کے خلاف فوری کارروائی کا مطالبہ کیا گیا ہے۔
