وزارت آئی ٹی کے ادارے یونیورسل سروس فنڈ کے بورڈ آف ڈائریکٹرز نے 13 ارب روپے مالیت کے 9 میگا پروجیکٹس کی منظوری دیدی۔
یو ایس ایف بورڈ آف ڈائریکٹرز کا اہم اجلاس چیئرمین بورڈ وفاقی سیکرٹری آئی ٹی ضرار ہاشم خان کی زیر صدارت ہوا،اجلاس میں چیئرمین پی ٹی اے میجر جنرل (ر)حفیظ الرحمان، ممبر ٹیلی کام جہانزیب رحیم، چیف ایگزیکٹو آفیسر یو ایس ایف چوہدری مدثر نوید ،محمد یوسف اور عائلہ ماجد نے شرکت کی،دوران اجلاس ملک کے 11 اضلاع کیلئے ہائی اسپیڈ انٹرنیٹ، وائس کمیونیکیشن اور فائبر آپٹیکل کیبل کے 9 میگا پروجیکٹس کی منظوری دی گئی جب کہ منصوبوں کی مجموعی لاگت 13ارب روپے ہے ، ذرائع کے مطابق ان منصوبوں کی تکمیل سے 55 لاکھ سے زائد افراد کو انٹرنیٹ اور موبائل کنیکٹیویٹی سہولیات فراہم ہوں گی ،مزید برآں 11 اضلاع کے 178 ٹاؤنز و یونین کونسلز اور 753 گاؤں کے مکین ڈیجیٹل دنیا سے منسلک ہوسکیں گے۔
