غزہ میں فلسطینیوں پر جاری اسرائیلی بمباری، محاصرے اور مظالم کے خلاف دنیا بھر میں عوام سڑکوں پر نکل آئے۔
یورپ، ایشیا اور شمالی امریکا کے مختلف ممالک میں بڑے پیمانے پر مظاہرے کیے گئے جن میں ہزاروں افراد نے شرکت کرتے ہوئے فلسطینی عوام سے یکجہتی اور فوری جنگ بندی کا مطالبہ کیا۔کینیڈا کے شہروں ٹورنٹو، وینکوور اور مونٹریال میں ہزاروں مظاہرین نے ریلیاں نکالیں۔ شرکاء نے فلسطینی جھنڈے اور پلے کارڈز اٹھا رکھے تھے جن پر ’’فری فلسطین‘‘، ’’غزہ جل رہا ہے‘‘ اور ’’اسرائیلی جارحیت بند کرو‘‘ جیسے نعرے درج تھے۔ مظاہرین نے عالمی برادری سے مطالبہ کیا کہ اسرائیل کو جنگی جرائم پر جواب دہ بنایا جائے اور فوری طور پر انسانی امداد کی فراہمی یقینی بنائی جائے۔
اسرائیل: تل ابیب میں حکومتی پالیسیوں کے خلاف احتجاج
اسرائیل کے اندر بھی احتجاج کی لہر اٹھی۔ تل ابیب میں ہزاروں اسرائیلی شہری وزیراعظم نیتن یاہو کی حکومت کے خلاف سڑکوں پر آگئے۔ مظاہرین نے کہا کہ ’’یہ جنگ اسرائیل کی سلامتی نہیں بلکہ اخلاقی شکست ہے‘‘۔ انہوں نے فلسطینیوں پر بمباری کو غیر انسانی اور شرمناک قرار دیتے ہوئے فوری جنگ بندی اور قیدیوں کے تبادلے کا مطالبہ کیا۔
یونان: ایتھنز میں بڑے پیمانے پر مارچ
یونان کے دارالحکومت ایتھنز میں ہزاروں شہریوں نے فلسطینی عوام کے ساتھ یکجہتی کے لیے مارچ کیا۔ شرکاء نے بینرز اور پلے کارڈز اٹھا رکھے تھے جن پر لکھا تھا ’’فلسطینیوں کی نسل کشی بند کرو‘‘، ’’غزہ کو زندہ رہنے دو‘‘ اور ’’انصاف نہیں تو امن نہیں‘‘۔ مظاہرین نے حکومت پر زور دیا کہ اسرائیل سے تعلقات منقطع کیے جائیں اور یورپی یونین و اقوام متحدہ فعال کردار ادا کریں۔
اسپین: طبی عملے کا علامتی احتجاج
اسپین میں طبی عملے نے انوکھے انداز میں احتجاج کرتے ہوئے اپنے ہاتھوں کو سرخ رنگ سے رنگا۔ یہ علامتی عمل فلسطینی بچوں اور مریضوں کے قتل کی نشاندہی کے طور پر کیا گیا۔ مظاہرین نے اسرائیلی کارروائیوں کو ’’انسانیت کے خلاف جرم‘‘ قرار دیا۔
جاپان: تنہا احتجاج کرنے والے کارکن کی آواز
ٹوکیو میں جاپانی سماجی کارکن یوسوکی گزشتہ دو برس سے مسلسل فلسطینی عوام کے حق میں تنہا احتجاج کر رہے ہیں۔ اس بار وہ فلسطینی پرچم اٹھائے سڑک پر نظر آئے اور کہا: ’’خاموشی، ظالم کا ساتھ دینے کے مترادف ہے‘‘۔ماہرین کا کہنا ہے کہ اگر عالمی سطح پر یہ احتجاجی لہر جاری رہی تو بڑی طاقتوں پر دباؤ میں اضافہ ہوگا کہ وہ فلسطینی عوام کے تحفظ کے لیے عملی اقدامات کریں۔
پاک–بھارت میچ میں حارث رؤف اور ابھیشیک شرما کے درمیان گرما گرمی
پاک سعودی دفاعی معاہدہ اور ‘معرکۂ حق’ نے بھارت کو عبرت دی،وزیراعظم آزادکشمیر
جنوبی لبنان میں اسرائیلی ڈرون حملہ، 5 افراد شہید
جنوبی لبنان میں اسرائیلی ڈرون حملہ، 5 افراد شہید
زیارت: اغوا کے بعد اسسٹنٹ کمشنر اور بیٹے کو قتل کردیا گیا
