باغی ٹی وی کی رپورٹ کے مطابق محکمہ صحت سندھ نے پی ایس ایل میچز کے لیے ہیلتھ ایڈوائزری جاری کر دی
ہیلتھ ایڈوائیزری کے مطابق 15دن کے دوران بیرون ممالک سے آنے والے افراد کا نیشنل اسٹیڈیم آنا ممنوع ہوگا،سانس کے امراض میں مبتلا افراد کا اسٹیڈیم میں داخلہ منع ہے،اسٹیڈیم میں تمام افراد ایک دوسرے سے سیٹوں پر 3 فٹ کے فاصلے سے بیٹھیں،تمام شائقین کرکٹ سینیٹائزر اور پانی کا استعمال کریں،کھانسی اور چھینک کے درمیان تمام افراد منہ ضرور ڈھانپیں،اسٹیڈیم میں تھوکنے اور چہرے کو بار بار چھونے سے احتیاط کریں،
دوسری جانب سٹیڈیم میں آنے والے شائقین کرکٹ کے ہاتھ دھلوانے کا بھی انتظام کیا گیا ہے، پہلے ہاتھ دھلوائے جائیں گے پھر سٹیڈیم میں داخلہ ہو گا
پاکستان سپر لیگ 2020 کا26واں میچ کراچی کنگز اور لاہور قلندز کے مابین کھیلا جائے گا۔ آج شیڈول میچ دونوں ٹیموں کے لیے انتہائی اہم ہے۔میچ میں فتح ، کراچی کنگز اور لاہور قلندرزدونوں ٹیموں کے لیے اگلے مرحلے میں رسائی کے امکانات روشن کردے گی
نیشنل اسٹیڈیم کراچی میں کراچی کنگز اور لاہور قلندرز نیشنل اسٹیڈیم کراچی میں آمنے سامنے ہوں گے۔اسٹیڈیم کے اندر اور باہر سیکیورٹی کے سخت انتظامات کئے گئے ہیں۔پاک فوج، رینجرز،اسپیشل برانچ کی بھی نفری تعینات کردی گئی ہے .پاکستان سپر لیگ کی انتظامیہ کے مطابق نیشنل اسٹیڈیم کے اطراف سیکورٹی کے سخت انتظامات کئے گئے ہیں۔ بم ڈسپوزل یونٹ بھی اسٹیڈیم کے اندر اور باہر موجود رہے گا،سی سی ٹی وی کیمروں کی مدد سے بھی مانیٹرنگ کی جائے گی۔
پولیس حکام نے بتایا کہ شائقین کرکٹ کے لیے 4 مقامات پر پارکنگ کا انتظام کیا گیا ہے۔شائقین وفاقی اردو یونیورسٹی گراؤنڈ اورغریب نواز فٹ بال گراؤنڈ میں گاڑیاں پارک کرسکیں گے،ایکسپو سینٹر اور رعنا لیاقت علی گرلزکالج بھی پارکنگ کے لیے مختص کردیا گیا ہے۔شائقین کرکٹ کو پارکنگ ایریا سے شٹل بس کے ذریعے اسٹیڈیم پہنچایا جائے گا۔
حکام نے ہدایت کی ہے کہ نیشنل اسٹیڈیم آنیوالے شائقین میچ کے ٹکٹ اور شناختی کارڈ ضرور ساتھ لائیں،پارکنگ کرنے کے لئے بھی اصل شناختی کارڈ اور میچ کا ٹکٹ دکھانا لازمی ہوگا۔میچ کے دوران کارسازسے اسٹیڈیم جانے والی سڑک عام ٹریفک کے لیے بند رہے گی،ملینیئم مال سے اسٹیڈیم آنے والی شاہراہ بھی عام ٹریفک کے لیے بند رہے گی،نیوٹاؤن سے نیشنل اسٹیڈیم کی جانب آنے والی سڑک پر عام ٹریفک کو جانے کی اجازت نہیں ہوگی.
