پی ٹی آئی اور سنی اتحاد کونسل کا مشترکہ اجلاس: اہم فیصلے کئے گئے
![suni itehad concil](https://baaghitv.com/wp-content/uploads/2024/03/suni-itehad-jpeg.webp)
اسلام آباد میں پاکستان تحریک انصاف (پی ٹی آئی) اور سنی اتحاد کونسل کی پارلیمانی پارٹی کا مشترکہ اجلاس منعقد ہوا، جس میں کئی اہم فیصلے کیے گئے۔ اجلاس میں پی ٹی آئی کے بانی عمران خان کی ایک سالہ قید کی مذمت کرتے ہوئے پارٹی کے اسیران کے اہلخانہ کے ساتھ مکمل یکجہتی کا اظہار کیا گیا۔اجلاس کے دوران ارکان نے فیصلہ کیا کہ پارلیمنٹ میں ایک قرارداد پیش کی جائے گی جس میں ارکان پارلیمنٹ کو دی جانے والی دھمکیوں کی مذمت کی جائے گی۔ اس موقع پر ارکان نے اس بات پر زور دیا کہ بانی چیئرمین اور دیگر رہنماؤں پر درج مقدمات کے ٹھوس ثبوت نہیں ہیں اور کارکنان کی قید ناحق پاکستان میں انصاف کے ساتھ کھلی زیادتی ہے۔
پارلیمانی پارٹی کے اجلاس میں پی ٹی آئی کارکنان اور ارکان پارلیمنٹ کی جبری گمشدگیوں کی بھی شدید مذمت کی گئی۔ اجلاس میں شریک اراکین نے اس بات پر زور دیا کہ ملک میں انصاف اور قانون کی حکمرانی کو یقینی بنانا ضروری ہے اور سیاسی کارکنان کے حقوق کی حفاظت کے لئے ہر ممکن اقدامات کیے جائیں گے۔اس موقع پر سنی اتحاد کونسل کے نمائندوں نے بھی اپنی حمایت کا اظہار کرتے ہوئے کہا کہ وہ پی ٹی آئی کے ساتھ مل کر ہر ممکن اقدامات کریں گے تاکہ انصاف اور حقوق کی بحالی کو یقینی بنایا جا سکے۔