پاکستان تحریک انصاف کے ایم این اے کا مبینہ اغوا

پاکستان تحریک انصاف (پی ٹی آئی) کے رکن قومی اسمبلی، بیرسٹر صاحبزادہ محمد امیر سلطان کو رات گئے لاہور میں ان کے گھر سے مبینہ طور پر اغوا کر لیا گیا ہے۔
پی ٹی آئی کے جنرل سیکرٹری حافظ ذیشان رشید کے مطابق، صاحبزادہ امیر سلطان کو سرور روڈ کے علاقے میں ان کی رہائش گاہ سے اغوا کیا گیا۔ انہوں نے اس کارروائی کو غیر قانونی قرار دیا۔اس واقعے پر رد عمل دیتے ہوئے، پنجاب اسمبلی کے رکن شیخ امتیاز نے حکومت پر تنقید کرتے ہوئے کہا، "ظلم کے یہ ضابطے ہم نہیں مانتے۔ شرم کرو، حیا کرو، امیر سلطان کو رہا کرو۔” انہوں نے اس عمل کی شدید مذمت کی اور امیر سلطان کی فوری رہائی کا مطالبہ کیا۔
دوسری جانب، ایس پی کینٹ اویس شفیق نے اس واقعے سے متعلق پولیس کی کسی بھی کارروائی سے انکار کیا ہے۔ انہوں نے کہا کہ پولیس نے صاحبزادہ امیر سلطان کو گرفتار نہیں کیا اور نہ ہی انہیں اغوا کے متعلق کوئی اطلاع موصول ہوئی ہے۔ تاہم، انہوں نے کہا کہ اگر لواحقین درخواست دیں گے تو معاملے کی تحقیقات کا آغاز کیا جائے گا۔یہ واقعہ پاکستان کی سیاسی صورتحال میں کشیدگی کو مزید بڑھا سکتا ہے۔ پی ٹی آئی رہنماؤں کا کہنا ہے کہ وہ اس معاملے کو انتہائی سنجیدگی سے لے رہے ہیں اور جلد از جلد امیر سلطان کی بازیابی کے لیے تمام ممکنہ اقدامات کریں گے۔