راولپنڈی: سینئیر سیاسی رہنما چوہدری نثار علی خان کا کہنا ہے کہ بانی پی ٹی آئی 54 سال سے میرا دوست ہے مگر میں تحریک انصاف میں شامل کیوں نہیں ہوا ابھی نہیں بتا سکتا، بتایا تو بانی پی ٹی آئی کی مشکلات میں مزید اضافہ ہوگا-
باغی ٹی وی :اڈیالہ روڈ پر انتخابی جلسے سے خطاب کرتے ہوئے حلقہ این اے 54،53 اور پی پی 10 سے آزاد امیدوار چوہدری نثار علی خان نے کہا کہ ملک مشکل ترین دور سے گزررہا ہے،عمران خان نے اپنی جماعت میں شامل کرنے کے لیے کافی مرتبہ اصرار کیابانی پی ٹی آئی 54 سال سے میرا دوست ہے مگر میں تحریک انصاف میں شامل کیوں نہیں ہوا ابھی نہیں بتا سکتا، بتایا تو بانی پی ٹی آئی کی مشکلات میں مزید اضافہ ہوگا، میں دوست کی مشکلات میں اضافہ نہیں کرنا چاہتا۔
انہوں نے کہا کہ میں چاہتا ہوں الیکشن کے بعد کسی جماعت میں عزت کے ساتھ جاؤں، انتخابات 2018 میں کیا ہوا، اس کی وجہ کچھ اور تھی، پھر کبھی بتاؤں گا، عمران نے کسی کو پارٹی میں شامل کرنے کی اتنی کوشش نہیں کی جتنی میرے لیے کی۔
چوہدری نثار نے کہا کہ مسلم لیگ ن میں 35 سال گزارے، بہت سے راز میرے پاس ہیں مگر ان پر تنقید نہیں کروں گا، اپنے حلقے میں ریکارڈ ترقیاتی کام کرائے جو لوگ کہتے مسلم لیگ ن نے ترقیاتی کام کروائے تو ان کو بولیں ڈیڑھ سال اب حکومت رہی کوئی ایک اینٹ لگائی ہے تو دکھا دیں آپ سے جو ووٹ مانگنے آئے اس سے پوچھیں کتنے ترقیاتی کام کرائے ہیں، میں نے اس حلقے کے عوام کی خدمت کی میری اولا د بھی آپ کی خدمت کرے گی۔
