ممتاز حیدر
اسلام آباد:متحدہ قومی موومنٹ (ایم کیو ایم) پاکستان کے سینئر رہنما اور رکن قومی اسمبلی ڈاکٹر فاروق ستار نے بھارتی وزیراعظم نریندر مودی کو شدید تنقید کا نشانہ بناتے ہوئے کہا ہے کہ مودی نے بھارت کے چہرے سے سیکولرازم کا جھوٹا نقاب اتار کر اصل چہرہ دنیا کے سامنے بے نقاب کر دیا ہے۔
قومی اسمبلی کے اجلاس میں اظہارِ خیال کرتے ہوئے ڈاکٹر فاروق ستار نے کہا کہ ’’مودی بیٹا، تم نے بھارت کے منہ سے سیکولرازم کا نقاب اٹھا کر بہت اچھا کیا ہے۔ تمہاری ذہنیت نے ہمارے اس مؤقف کو تقویت دی ہے کہ ہمارے بزرگوں نے پاکستان کے قیام کے لیے جو قربانیاں دیں وہ بالکل درست تھیں۔‘‘انہوں نے کہا کہ بھارتی حکمران جماعت اور اس کی پالیسیوں نے خود یہ ثابت کر دیا ہے کہ بھارت میں اقلیتوں، بالخصوص مسلمانوں کے لیے کوئی جگہ نہیں بچی۔ انہوں نے بھارت میں ہونے والے حالیہ واقعات کا حوالہ دیتے ہوئے کہا کہ ’’پہلگام واقعہ بھارت کی سب سے بڑی انٹیلی جنس ناکامی ہے، جیسا کہ اس سے قبل پلوامہ میں بھی انٹیلی جنس کی ناکامی دیکھنے میں آئی۔‘‘
ڈاکٹر فاروق ستار کا کہنا تھا کہ بھارت نے اس بار دنیا کو گمراہ کرنے کی کوشش کی، لیکن عالمی برادری نے بھارتی بیانیے کو یکسر مسترد کر دیا۔ انہوں نے کہا کہ ’’اس واقعے کا کوئی ثبوت دنیا کے سامنے پیش نہیں کیا گیا، اور یوں بھارت کا جنگی جنون، جھوٹ اور مکاری بے نقاب ہو گئی ہے۔‘‘گجرات فسادات کا ذکر کرتے ہوئے انہوں نے مودی کی سابقہ کردار پر سوال اٹھاتے ہوئے کہا’’گجرات میں مسلمانوں کا قتل عام کس نے کیا؟ گجرات کے قصائی کا لقب کس کو دیا گیا؟‘‘ان سوالات کے ذریعے انہوں نے نریندر مودی کے ماضی کے متنازع کردار کی طرف اشارہ کیا۔
ایم کیو ایم رہنما نے اپنے خطاب میں ملکی یکجہتی پر زور دیتے ہوئے کہا کہ پوری قوم اس وقت پاکستان کی مسلح افواج کے ساتھ کھڑی ہے۔ انہوں نے پاکستان تحریک انصاف (پی ٹی آئی) کو بھی آڑے ہاتھوں لیتے ہوئے کہا کہ ’’ڈی جی آئی ایس پی آر کی بریفنگ کا بائیکاٹ کر کے پی ٹی آئی نے کیا پیغام دیا؟ جب پوری قوم ایک جانب کھڑی ہے تو یہ دوسری طرف کیوں کھڑے ہیں؟‘‘
