خانہ کعبہ میں ویڈیو بنانے پر پی ٹی آئی رہنما فہیم خان سعودی عرب میں گرفتار
![pti](https://baaghitv.com/wp-content/uploads/2024/04/PTI-flag-1-2-jpg.webp)
پی ٹی آئی کے رہنما اور سابق ایم این اے فہیم خان کو سعودی عرب میں خانہ کعبہ پر 9 مئی کے جھوٹے بیانیے پر حلف لیتے ہوئے ویڈیو بنانے کے الزام میں گرفتار کر لیا گیا ہے۔ پی ٹی آئی کی ترجمان فوزیہ صدیقی نے اس گرفتاری کی مذمت کرتے ہوئے کہا کہ پاکستان تحریک انصاف کراچی ڈویژن اس اقدام کی سخت مخالفت کرتی ہے۔ انہوں نے کہا کہ فہیم خان نے خانہ کعبہ میں 9 مئی کے بیانیے پر حلف لے کر بات کی، اور اب بانی پی ٹی آئی کے حق میں کسی بھی بیان پر گرفتاریاں کی جا رہی ہیں، چاہے وہ پاکستان میں ہوں یا بیرون ملک۔فوزیہ صدیقی نے پی ٹی آئی کے مرکزی رہنماؤں سے اپیل کی کہ اس معاملے پر فوری ایکشن لیں۔ انہوں نے فارم 47 کی حکومت پر الزام عائد کیا کہ وہ سوشل میڈیا پر قدغن لگانے کے بعد اب بیرون ملک بھی لوگوں کو گرفتار کروا رہی ہے۔ انہوں نے دعویٰ کیا کہ سعودی عرب میں ن لیگ کے تعلقات ہیں اور اسی بنا پر کئی پاکستانیوں کو ڈی پورٹ کیا جا چکا ہے۔انہوں نے مزید کہا کہ عمران خان کے حق میں بات کرنا ن لیگی حکومت کے لیے جرم بن گیا ہے، لیکن ہم اس جرم کو جاری رکھیں گے اور عمران خان کے حق میں آواز بلند کرتے رہیں گے۔ انہوں نے فارم 47 کی حکومت اور سعودی عرب کے اس اقدام کی شدید مذمت کرتے ہوئے کہا کہ یہ آوازیں بند نہیں ہوں گی اور 9 مئی کے بیانیے کو دبانے کی کوششیں ناکام ہوں گی۔