پی ٹی آئی رہنماؤں کو عمران خان سے ملاقات کی اجازت نہ ملی

تحریک انصاف کے رہنماؤں کی اڈیالہ جیل میں آج عمران خان سے ملاقات ہونی تھی، پی ٹی آئی رہنما جیل پہنچے تاہم ملاقات نہیں کروائی گئی

تحریک انصاف کے رہنما عمر ایوب نے شبلی فراز،رؤف حسن و دیگر کے ہمراہ اڈیالہ جیل کے باہر میڈیا ٹاک کرتے ہوئے کہا کہ تحریک انصاف متحد ہے، ہم سب لوگ ایک ہیں، ہمارے اندر کوئی تفرقہ نہیں، ہم سب نے ایک ہو کر کام کرنا ہے، ہمارے سینے میں عمران خان کی محبت ہے، ہم ایک ہیں اور رہیں گے، دنیا کان کھول کر سن لے اگلے وزیراعظم بہت جلد قیدی نمبر 804 ہوں گے،ہم 1:15 بجے کے یہاں اڈیالہ جیل میں موجود ہیں لیکن ہماری عمران خان سے ملاقات نہیں کروائی گئی،ہم اڈیالہ جیل کے اندر چوکی میں کھڑے تھے کہ ایس ایچ اوجاوید وہاں آیا اور کہا کہ اوپر سے آرڈر ہے آپ یہاں سے چلے جائیں،

شہر یارآفریدی کا کہنا تھا کہ ایک بات واضح ہے یہ کچھ بھی کر لیں جتنا مرضی ظلم کرلیں رب ذوالجلال کی قسم ہم تقسیم نہیں ہوں گے، ہم عمران خان کے سائے تلے ایک ٹیم ہیں،

واضح رہے کہ پی ٹی آئی میں گروپ بندی ہو چکی ہے، عمران خان نے آج دو گروپس کو ملاقات کے لیے بلایا تھا تا ہم آج ملاقات نہیں کرنے دی گئی.