اسلام آباد: پی ٹی آئی کے انتخابی نشان بلے کے واپسی کا معاملہ، سپریم کورٹ کا بلے کے نشان کے کیس کو 10 جنوری کو مقرر کرنے کا حکم دے دیا-
باغی ٹی وی : سپریم کورٹ میں چیف جسٹس قاضی فائز عیسیٰ کی سربراہی میں تین رکنی بینچ نے کیس کی سماعت کی جس میں جسٹس محمد علی مظہر اور جسٹس مسرت ہلالی بھی شامل ہیں،دوران سماعت چیف جسٹس قاضی فائز عیسیٰ نے پی ٹی آئی کے وکیل حامد خان روسٹرم پر بلایا اور حامد خان سے استفسار کیا کہ کیا آپ کی درخواست کل مقرر کر دیں؟ –
وکیل حامد خان نے استدعا کی کہ آج ہی سماعت کے لیے مقرر کر دیں،چیف جسٹس پاکستان نے کہا کہ آج نو ممبر بنچ بھی ہے اور ایک خصوصی بنچ بھی ہے، حامد خان نے کہا کہ ہماری ترجیح آج ہے نہیں تو پھر پرسوں لگا دیں ، چیف جسٹس پاکستان نے کہا کہ آپ فیصلے کے خلاف آئے یا 184 تھری کی درخواست ہے؟ حامد خان نے کہا کہ پشاور ہائیکورٹ کے حکم کے خلاف 185 تھری میں سپریم کورٹ آئے ہیں، چیف جسٹس نے کہا کہ بس پھر معاملہ ججز کمیٹی کے پاس نہیں جانا تو پرسوں کیس مقرر ہو گیا-
واضح رہے کہ پی ٹی آئی وکلا نے سپریم کورٹ رجسٹرار سے بلے کے نشان کی بحالی کے لیے آج ہی درخواست سماعت کے لیے مقرر کرنے کی استدعا کی تھی پی ٹی آئی نے پشاور ہائیکورٹ کے فیصلے کے خلاف سپریم کورٹ سے رجوع کر رکھا ہے،ذرائع کے مطابق پی ٹی آئی وکلا نے بلے کے نشان کی بحالی کے لیے دائر درخواست کے حوالے سے سپریم کورٹ رجسٹرار سے ملاقات کی ہے جس میں آج ہی درخواست سماعت کے لیے مقرر کرنے کی استدعا کی ہے،سپریم کورٹ رجسٹرار آفس درخواست کو پہلے ہی C.P7/2024 نمبر لگا چکا ہے،پی ٹی آئی وکلا میں بیرسٹر گوہر اورحامد خان شامل ہیں، جنہوں نے رجسٹرار سپریم کورٹ کو کہا کہ یہ اہم نوعیت کا مقدمہ ہے، اس فوری طور پر سماعت کی جائے۔