پنجاب اسمبلی میں ڈاکٹر عافیہ صدیقی کی رہائی کیلئے قرارداد جمع

پنجاب اسمبلی میں ایم پی اے باسمہ چودھری نے امریکی جیل میں قید پاکستانی ڈاکٹر عافیہ صدیقی کی رہائی کے لیے ایک اہم قرارداد جمع کرادی ہے۔ قرارداد میں عافیہ صدیقی کی پاکستانی شہری ہونے کے ناطے حفاظت کا مطالبہ کیا گیا ہے، اور اس بات پر زور دیا گیا ہے کہ ہر پاکستانی شہری کو اس حق کا تحفظ حاصل ہے چاہے وہ دنیا کے کسی بھی کونے میں ہو۔قرارداد کے متن میں کہا گیا ہے کہ عافیہ صدیقی کے وکیل نے انکشاف کیا ہے کہ ان پر جسمانی اور جنسی تشدد کیا جا رہا ہے، اور ان کی عزت کی پامالی کی جا رہی ہے۔ اس کے علاوہ، ذہنی دباؤ ڈالا جا رہا ہے اور انہیں اپنے مذہب سے دور کرنے کی کوشش کی جا رہی ہے۔
قرارداد میں مزید کہا گیا ہے کہ عافیہ صدیقی کو امام سے ملنے نہیں دیا جا رہا اور انہیں قانونی دفاع کے حق سے بھی محروم کیا جا رہا ہے۔ دستاویزات پر دستخط کرنے کی اجازت نہ دینے کی شکایت بھی کی گئی ہے، اور کہا گیا ہے کہ پاکستان کی بیٹی پر یہ ظلم اور بربریت ہرگز قابل قبول نہیں۔قرارداد میں مطالبہ کیا گیا ہے کہ عافیہ صدیقی کو وطن واپس لانے کے لیے بھرپور اور مخلصانہ کوششیں کی جائیں، اور یہ کوششیں صرف زبانی نہیں بلکہ عملی طور پر کی جائیں۔ اسلام آباد ہائیکورٹ کے آرڈرز پر فوری عمل درآمد کا بھی کہا گیا ہے۔قرارداد میں عافیہ صدیقی کی گرتی ہوئی جسمانی اور ذہنی صحت کو مدنظر رکھتے ہوئے انسانی ہمدردی کی بنیاد پر رہائی کی درخواست کی گئی ہے۔ اس کے علاوہ، وزیراعظم پاکستان سے مطالبہ کیا گیا ہے کہ وہ امریکہ سے تحریری طور پر صدارتی معافی اور ہمدردی کی بنیاد پر رہائی کے لیے درخواست کریں۔
قرارداد میں حکومت پاکستان سے درخواست کی گئی ہے کہ امریکی سٹیٹ ڈیپارٹمنٹ سے فوری طور پر ڈاکٹر عافیہ صدیقی کی میڈیکل ٹیم کے معائنہ اور اپنی مرضی کے امام سے ملاقات کی اجازت طلب کی جائے۔یہ قرارداد عافیہ صدیقی کی رہائی کے معاملے پر مزید توجہ مبذول کروانے اور انسانی حقوق کی خلاف ورزیوں کے خلاف ایک مضبوط پیغام دینے کی کوشش ہے۔