مرکزی کسان لیگ کے چیئرمین چوہدری ذوالفقار علی اولکھ نے کہا ہے کہ پنجاب کے کسان کا استحصال نہیں ہونے دیں گے، حکومت کی جانب سے گندم کی قیمت 3500 روپے فی من مسترد کرتے ہیں، کسان کو اس کا جائز حق ملنا چاہیے،مارکیٹ میں آٹا، چینی سمیت دیگر اشیا کی قیمتوں میں اضافہ حکومتی نااہلی ہے
چوہدری ذوالفقار علی اولکھ کا کہنا تھا کہ کسان ملکی معیشت کی ریڑھ کی ہڈی ہے، لیکن افسوس کہ ہمیشہ کسان کو اس کے حقوق نہیں ملتے،محنت کش طبقے کو اس کا جائز حق نہیں دیا جاتا،3500 روپے فی من گندم کی قیمت سے کسان کی لاگت کی قیمت ہی پوری نہیں ہو گی، پنجاب حکومت گندم کی قیمتوں کا کسانوں کے ساتھ مشاورت کر کے از سر نو تعین کرے، مرکزی مسلم لیگ کسانوں کی آواز بنے گی اور انکے جائز حقوق کے لئے انکے شانہ بشانہ کھڑی ہو گی،پنجاب میں سیلاب میں کسانوں کی فصلیں،زمینیں تباہ ہو گئیں،حکومت کسانوں کو اس ضمن میں بھی ریلیف دے، مارکیٹ میں آٹا، چینی، سبزیوں اور دیگر اشیائے خورونوش کی قیمتوں میں مسلسل اضافہ حکومت کی نااہلی اور ناقص معاشی پالیسیوں کا نتیجہ ہے،حکومت صرف اجلاسوں کے روئیداد کی بجائے غریب آدمی کو ریلیف دے.
