پنجاب اسمبلی میں بھی امریکی قرارداد کے خلاف مذمتی قرار داد منظور

قومی اسمبلی کے بعد پنجاب اسمبلی میں بھی امریکی قرارداد کے خلاف مذمتی قرار داد منظور کی گئی ہے

پنجاب اسمبلی کا اجلاس سپیکر ملک احمد خان کی زیر صدارت ہوا، پنجاب اسمبلی میں حکومت رکن احسن رضا خان نے قرارداد پیش کی،قرارداد کے متن کے مطابق امریکی قرارداد پاکستان کےاندرونی معاملات میں مداخلت ہے، امریکی کانگریس کی قرارداد پاکستان اور امریکا کے دو طرفہ تعلقات کی عکاس نہیں،امریکی قرارداد پاکستان میں ہیجانی کیفیت پیدا کرنے کی کوشش ہے، پاکستان کے عام انتخابات کو اس قرارداد کے ذریعے متنازع بنانے کی کوشش کی گئی، پاکستان جمہوری اقدار کا پاسدار ہے اور تمام ادارے آزادی اظہار رائے پر یقین رکھتے ہیں، امریکی قرارداد یہودی لابی کی طرف سے لائی گئی، پاکستان میں انسانی حقوق کی پامالی کو اس قرارداد میں غلط انداز میں پیش کیا گیا،پاکستان کی سیاسی جماعتیں جمہوریت کے حوالے سے شعور رکھتی ہیں، امریکی کانگریس کو دوسروں کے امور میں مداخلت کے بجائے فلسطین اور کشمیر کی حمایت کرنی چاہیے۔

پنجاب اسمبلی اجلاس کے موقع پر سیکورٹی کے سخت انتظامات کئے گئے تھے،سنی اتحاد کونسل کے اراکین نے پنجاب اسمبلی کے ایوان میں شرکت نہیں کی،اراکین کی معطلی کی وجہ سے دیگر اراکین نے یکجہتی کا اظہار کیا.