انسداد دہشت گردی عدالت لاہور نے کوٹ لکھپت جیل میں 9 مئی کو شیر پاؤ پل پر ہونے والے اشتعال انگیز جلسے اور جلاؤ گھیراؤ کیس میں اپوزیشن لیڈر پنجاب اسمبلی ملک احمد بھچر کو 10 سال قید کی سزا سنادی ہے۔ عدالت نے اس مقدمے کے تحت دیگر ملزمان کو بھی 10 سال قید کی سزا سنائی ہے۔
انسداد دہشت گردی عدالت کے جج ارشد جاوید نے کیس کی سماعت مکمل کرتے ہوئے اہم فیصلے کا اعلان کیا۔ عدالت میں ملزمان کے وکلاء اور سرکاری وکیل نے حتمی دلائل پیش کیے جن کے بعد مقدمے کا جیل ٹرائل مکمل کیا گیا۔
عدالت نے ایم این اے احمد چھٹہ سمیت تمام دیگر کارکنوں کو بھی 10، 10 سال قید کی سزا کا حکم سنایا۔ تاہم فیصلے کے وقت اپوزیشن لیڈر ملک احمد بھچر سمیت کوئی بھی ملزم عدالت میں موجود نہیں تھا۔
مزید برآں، انسداد دہشت گردی عدالت نے بتایا کہ ڈاکٹر یاسمین راشد کے وکیل کل صبح 10 بجے مزید دلائل دیں گے جس کے بعد ان کے خلاف فیصلہ سنایا جائے گا۔ عدالت نے اس کیس میں دیگر 14 ملزمان کے خلاف بھی ٹرائل مکمل کیا ،اس مقدمے میں 61 سرکاری گواہوں نے اپنے بیانات ریکارڈ کرائے جو عدالت میں پیش کیے گئے۔ یاد رہے کہ میانوالی میں ہنگامہ آرائی اور توڑ پھوڑ کے کیس کے بیشتر ملزمان ضمانت پر ہیں۔
