پورن بھگت دی کہانی سنگیت دے رنگ وچ ، مرے کالج سیالکوٹ دے میر حسن ہال وچ روح پرور پیشکش

سیالکوٹ (باغی ٹی وی، ڈسٹرکٹ رپورٹر مدثر رتو)سیالکوٹ دی مقدس دھرتی، جیہڑی پنج ہزار سالہ تاریخ دا گہوارہ اے، ہمیشہ توں مختلف تہذیباں تے مذہباں دا سنگم رہی اے۔ ایہہ اوہی دھرتی اے جتھے پورن بھگت ورگے روحانی کردار نے جنم لیا، جیہڑا گیارھویں صدی عیسوی دا اک معتبر تے روشن کردار سمجھیا جاندا اے۔ پورن بھگت دا کنواں، جیہڑا گاؤں کرول (چپراڑ روڈ، سیالکوٹ) وچ اج وی موجود اے، اس خطے دی روحانیت، محبت تے ثقافت دا جیندا جاگدا نشان اے۔

پورن بھگت راجہ سالباہن تے رانی اچھراں دا فرزند سی، تے اوہدے سوتیلے پرا راجہ رسالو (رانی لونا دا پتر) نے وی سیالکوٹ تے راج کیتا سی۔ ایہہ داستان پنجابی ادب وچ میاں قادر یار نے اپنی شاعری راہیں ہمیشہ لئی امر کر دِتی، جیہڑی آج وی سیالکوٹ دی پہچان دا فخر اے۔

پہلی واری، اس تاریخی تے روحانی کہانی نوں سیالکوٹ دی دھرتی تے سٹیج دی زینت بناؤن دا اعزاز گورنمنٹ مرے کالج نوں حاصل ہویا۔ تاریخی میر حسن ہال وچ یکم نومبر، بروز ہفتہ، شام سات وجے، پورن بھگت دی زندگی نوں کہانی، سنگیت تے روحانیت دے حسین امتزاج وچ پیش کیتا گیا۔

لاہور توں مشہور اداکارہ، کہانی کار تے سنگت دی روح رواں ہما صفدر اپنی ٹیم دے نال سیالکوٹ پہنچی، تے انہاں نے پورن بھگت دی داستان نوں اس قدر خوبصورتی تے جذبے نال پیش کیتا کہ سامعین دا دل موہ لیا۔ ساز دی نرمی، آواز دی مٹھاس تے لہجے دی تاثیر نے محفل وچ اک وجدانی کیفیت پیدا کر دِتی۔ ہما صفدر دی پیشکش نوں ویکھ کے محفل وچ بیٹھے لوک اس کہانی دے رنگ وچ کھو گئے۔

ایہہ تاریخی تقریب گورنمنٹ مرے کالج دے پرنسپل پروفیسر ندیم قیصر دی خصوصی سرپرستی وچ منعقد ہوئی، جیہڑے تقریب دے آخر تک موجود رہے تے آخر وچ تمام مہماناں دا شکریہ ادا کیتا۔ تقریب دی کامیابی دا سہرا معروف مورخ تے سیالکوٹ شناسی دے ماہر داؤد ظفر ندیم دے سر رہا، جیہڑے پروگرام دے منتظم اعلیٰ سن تے اپنی ٹیم نال مل کے وڈی محنت نال ایہہ روح پرور تقریب ترتیب دِتی۔

پروفیسر مہر الیاس (کوآرڈینیٹر پروگرام)، پروفیسر ندیم اسلام سلہری (فوکل پرسن) تے پروفیسر اعجاز خاں (ڈپٹی فوکل پرسن) نے وی ایہہ تقریب کامیاب بناؤن وچ مرکزی کردار نبھایا۔

تقریب وچ سیالکوٹ دے ادبی، سماجی تے تعلیمی حلقیاں دے نمایاں افراد تے سول سوسائٹی دے رکن، نال ہی طلبا تے طالبات دی وڈی تعداد موجود سی۔ خصوصی مہماناں وچ پروفیسر مہر الیاس، طاہر بٹ، لیفٹیننٹ کرنل محسن عدیل، پروفیسر آصف سلیم، ڈاکٹر کامران صوفی، پروفیسر وقار امین، پروفیسر اعزاز چوہدری، پروفیسر اکبر علی غازی، پروفیسر جاوید کمار، پروفیسر اسحاق علی، کلیم رضا، میاں عبدالشکور، ریاض حسین نقوی، علی عثمان باجوہ، ملک عزیز، ملک بلال احمد، جنید آفتاب، مہر ندیم، مدثر رتو، ملک اقبال، شکیل سیٹھی، زاہد شریف تے سیالکوٹ دے مختلف مکاتبِ فکر دے لوگ شامل سن۔

ایہہ شام سیالکوٹ دی ثقافتی تے روحانی تاریخ نوں سنگیت دے نال جوڑدی ہوئی اک یادگار جھلک بن گئی، جیہڑی اس دھرتی دی شناخت، محبت تے فن دی بقا دا استعارہ بن گئی۔