کراچی: مقامی عدالت نے مصطفیٰ عامر کے اغوا اور قتل کیس میں مقتول کی قبر کشائی کی درخواست منظور کرلی۔ کراچی کے جوڈیشل مجسٹریٹ نے تفتیشی افسر کی درخواست پر فیصلہ دیتے ہوئے قبر کشائی کا حکم دیا۔ اس کے ساتھ ہی عدالت نے قبر کشائی کے لیے میڈیکل بورڈ تشکیل دینے کا حکم بھی دیا ہے۔
عدالت کے حکم کے مطابق سیکرٹری صحت کو میڈیکل بورڈ تشکیل دینے کا کہا گیا ہے اور قبر کشائی مکمل کرنے کے بعد 7 دنوں میں رپورٹ پیش کرنے کی ہدایت کی گئی ہے۔
یہ فیصلہ اس وقت آیا جب پولیس اور تفتیشی افسران مصطفیٰ عامر کے قتل کی مکمل تفصیلات تک پہنچنے کی کوشش کر رہے ہیں تاکہ اس مقدمے کے ملزمان کو سخت سزائیں دلائی جا سکیں۔
دوسری جانب، سندھ ہائیکورٹ میں ملزم ارمغان کے جسمانی ریمانڈ سے متعلق ٹرائل کورٹ کے فیصلے کے خلاف درخواست کی سماعت کی گئی۔ ہائیکورٹ نے ملزم کو کل صبح ساڑھے 9 بجے پیش کرنے کا حکم دیا ہے۔ عدالت نے ریمانڈ سے متعلق کیس کا تمام اصل ریکارڈ بھی طلب کیا۔اس دوران، قائم مقام پراسیکیوٹر جنرل سندھ، منتظر مہدی نے منتظم جج پر عدم اعتماد کا اظہار کیا۔ انہوں نے کہا کہ مختلف ایف آئی آرز ہونے کے باوجود بھی ریمانڈ نہیں دیا گیا، اور بغیر ریمانڈ کے کیس کی تحقیقات کس طرح آگے بڑھیں گی؟ انہوں نے مزید کہا کہ ایک ماں کا بیٹا قتل ہوگیا ہے اور ڈی ایس پی زخمی ہوا ہے، ہمیں انصاف کے لیے کارروائی کی اجازت دی جائے۔
