بلوچستان کے دارالحکومت کوئٹہ کے ویسٹرن بائی پاس علاقے میں نامعلوم حملہ آوروں نے سیکیورٹی چیک پوسٹ پر دستی بم پھینک کر فرار ہو گئے۔ پولیس کے مطابق دونوں دھماکوں سے علاقے میں خوف و ہراس پھیل گیا، تاہم خوش قسمتی سے کوئی جانی نقصان نہیں ہوا۔سیکیورٹی فورسز اور پولیس فوری طور پر جائے وقوعہ پر پہنچ گئیں، علاقے کو گھیرے میں لے کر سرچ آپریشن شروع کیا گیا۔ بم ڈسپوزل اور فرانزک ٹیموں نے شواہد جمع کر لیے ہیں۔ ابتدائی اطلاعات کے مطابق حملہ سیکیورٹی اہلکاروں کو نشانہ بنانے کی کوشش ہو سکتی ہے۔ تحقیقات جاری ہیں۔
سیکیورٹی ذرائع کے مطابق بلوچستان کے مانہ فیڈر پہاڑی علاقے میں انٹیلی جنس کی بنیاد پر آپریشن کیا گیا جس میں بلوچ لبریشن آرمی (BLA) کا ایک سربراہ دہشت گرد ہلاک ہوگیا۔مارا گیا دہشت گرد متعدد دہشت گردانہ حملوں اور تنصیبات پر حملوں میں ملوث تھا۔ کارروائی کے دوران بھاری مقدار میں اسلحہ و گولہ بارود برآمد ہوا۔ علاقے میں سرچ آپریشن جاری ہے جبکہ حکام نے واضح کیا ہے کہ ریاست مخالف عناصر کے خلاف کارروائیاں جاری رہیں گی۔
بلوچستان کے ضلع آواران کے جھاؤ علاقے میں دہشت گردوں نے سیکیورٹی فورسز کی گاڑی پر راکٹ حملہ کیا، جس کے نتیجے میں کیپٹن ارطیز سمیت دو اہلکار زخمی ہوگئے۔زخمیوں کو فوری طور پر سی ایم ایچ خضدار منتقل کر دیا گیا۔ فورسز نے علاقے کو گھیرے میں لے کر علاقے میں کلیئرنس آپریشن شروع کر دیا ہے۔ جھاؤ اور ملحقہ علاقوں میں کشیدگی کی فضا برقرار ہے۔
قلات میں یکم نومبر کی رات سیکیورٹی فورسز نے کارروائی میں چار دہشت گرد ہلاک کیے جو "فتنہ الہندستان” نیٹ ورک سے وابستہ تھے۔آپریشن کے دوران بھاری اسلحہ، بارود اور دھماکہ خیز مواد برآمد کیا گیا۔ آئی ایس پی آر کے مطابق آپریشن عزمِ استحکام کے تحت دہشت گردی کے مکمل خاتمے تک کارروائیاں جاری رہیں گی۔
بلوچستان کے ضلع خاران کے علاقے بارشونکی میں قانون نافذ کرنے والے ادارے (LEAs) کی گاڑی کو مبینہ طور پر بارودی سرنگ (IED) سے نشانہ بنایا گیا۔غیر مصدقہ اطلاعات کے مطابق ایک دہشت گرد تنظیم نے ذمہ داری قبول کی ہے، تاہم سرکاری سطح پر تصدیق نہیں کی گئی۔ جانی نقصان یا نقصان کی تفصیلات تاحال سامنے نہیں آئیں۔
ضلع کچھی کے علاقے ختان میں مسلح افراد نے لیویز پولیس اسٹیشن پر حملہ کر کے قبضہ کر لیا۔ذرائع کے مطابق حملہ آوروں نے اہلکاروں کو یرغمال بنایا، اسلحہ لوٹا اور سرکاری ریکارڈ کو آگ لگا دی،واقعے کی سرکاری تصدیق نہیں ہو سکی، تاہم سیکیورٹی فورسز نے واقعے کی تحقیقات شروع کر دی ہیں۔
خیبر پختونخوا کے ضلع بنوں کے جانی خیل علاقے میں سیکیورٹی فورسز نے افغان دہشت گردوں کے خلاف آپریشن میں تین حملہ آوروں کو ہلاک کر دیا۔مارے جانے والوں میں ایک دہشت گرد کی شناخت انس ولد عبدالرحمان ساکن قندھار کے طور پر ہوئی جو سرحد پار حملوں کا ماسٹر مائنڈ سمجھا جاتا تھا۔کارروائی کے بعد علاقے کو کلیئر قرار دے دیا گیا۔
ضلع سوات کے تحصیل کبل کے کنجو علاقے میں نامعلوم حملہ آوروں نے امن کمیٹی کے سابق رکن مفتاح الدین کنجو کو گولی مار کر قتل کر دیا۔ چارسدہ میں جمعیت علمائے اسلام کے رہنما مولانا عبدالسلام ک و بھی قتل کیا گیا ہے،سیکیورٹی حکام کو شبہ ہے کہ حملے کے پیچھے "فتنہ الخوارج” گروہ ملوث ہے جو حالیہ دنوں میں امن کارکنوں کو نشانہ بنا رہا ہے۔
خیبر پختونخوا اسمبلی کی سیکیورٹی کمیٹی کو بریفنگ میں بتایا گیا کہ صوبے میں پولیس کے وسائل ناکافی ہیں۔آئی جی پی کے مطابق ایک لاکھ 30 ہزار اہلکاروں میں سے 30 فیصد وی آئی پی سیکیورٹی پر تعینات ہیں، جب کہ باقی اہلکار میدانی کارروائیوں میں مصروف ہیں۔گاڑیوں، دفاتر، اور کاؤنٹر ٹیررازم ڈیپارٹمنٹ کے لیے بجٹ کی کمی کا سامنا ہے۔پولیس حکام نے انتباہ کیا کہ اگر "ایکشن اِن ایڈ آف سول پاور آرڈیننس” ختم کیا گیا تو دہشت گردی سے نمٹنے میں مشکلات بڑھ جائیں گی۔
شمالی وزیرستان کے ذوہہ علاقے میں سیکیورٹی فورسز نے کارروائی میں حافظ گل بہادر گروپ کے دہشت گرد عبدالحمید عرف محمد کو ہلاک کر دیا۔مارا گیا دہشت گرد کئی حملوں اور تخریبی کارروائیوں میں ملوث تھا۔ علاقے میں سرچ آپریشن مکمل کر کے صورتحال کو قابو میں لے لیا گیا۔
