قومی و صوبائی اسمبلی کے حلقوں میں پولنگ جاری، ن لیگ کا پولنگ کے آغاز سے ہی دھاندلی کا الزام
باغی ٹی وی کی رپورٹ کے مطابق قومی اور صوبائی اسمبلی کے دو دو حلقوں پر ضمنی انتخابات کے لیے پولنگ کے جاری ہے
این اے 75 ڈسکہ اور پی پی 51 گوجرانوالا میں مسلم لیگ ن اور تحریک انصاف کے درمیان کانٹے کا مقابلہ متوقع ہے پنجاب اسمبلی کی نشست پی پی 51 مسلم لیگ ن کے ایم پی اے شوکت منظور چیمہ کے انتقال کے باعث خالی ہوئی تھی اور ن لیگ نے شوکت منظور چیمہ کی بیوہ بیگم طلعت منظور چیمہ کو اس پر امیدوار نامزد کیا ہے جب کہ تحریک انصاف نے چوہدری محمد یوسف کو میدان میں اتارا ہے، جماعت اسلامی کے امیدوار ناصرمحمود ہیں (ن) لیگ نے عام انتخابات کے دوران یہ نشست 31 ہزار سے زائد ووٹوں کی برتری سے جیتی تھی۔
سیالکوٹ میں قومی اسمبلی کی نشست این اے 75 مسلم لیگ ن کے ایم این اے سید افتخار الحسن شاہ المعروف سید ظاہرے شاہ کے انتقال کے باعث خالی ہوئی تھی۔مسلم لیگ ن نے اس بار اپنے مرحوم ایم این اے کی بیٹی سیدہ نوشین افتخار کو میدان میں اتارا ہے جب کہ تحریک انصاف کے نامزد امید وار علی اسجد ملہی ہیں۔ خیبرپختونخوا کے ضلع نوشہرہ میں صوبائی اسمبلی کی نشست پی کے 63 تحریک انصاف کے ایم پی اے میاں جمشید الدین کاکاخیل کے انتقال کے باعث خالی ہوئی تھی، یہاں ن لیگ کے میاں اختیارولی خان پی ڈی ایم کے مشترکہ امیدوارہیں جب کہ تحریک انصاف کے میاں عمرکاکا خیل، اے این پی کے میاں وجاہت اللہ اورتحریک لبیک کے مولانا ثناء اللہ میدان میں ہیں۔
ضلع کرم کے حلقہ این اے 45 کرم ون میں بھی آج ضمنی انتخابات ہورہے ہیں، حلقے میں 27 امیدوار میدان میں ہیں، پی ٹی آئی کے فخرزمان، آزاد امیدوار سید جمال ، جے یو آئی کے جمیل چمکنی کے مابین کانٹے دار مقابلہ متوقع ہے۔ یہ نشست جے یو آئی (ف) کے ایم این اے منیر خان اورکزئی کے انتقال کے باعث خالی ہوئی تھی۔
پولنگ اسٹیشنز کے اندر اور باہر سیکیورٹی کے سخت انتظامات کئے گئے ہیں ،گوجرانوالہ میں ضمنی الیکشن کے دوران پی پی 51 میں ن لیگی کارکنوں نے احتجاج کیا ہے،ن لیگی رہنما عطاء اللہ تارڑ نے الزام عائد کیا ہے کہ پولیس نے ہمارے کارکنوں کو حراست میں کرلیا ہے ،ضلعی انفارمیشن سیکریٹری میاں مدثر سمیت 4 افراد کو حراست میں لیا گیا
ڈسکہ میں لیگی امیدوار نوشین افتخار نےپولنگ اسٹیشن گورنمنٹ ڈگری کالج کا دورہ کیا،نوشین افتخار نےبیلٹ بکس کھلے ہونے اور دھاندلی کا الزام لگایا اس دوران امیدوار اور عملے میں تلخ کلامی بھی ہوئی
این اے 45 ، 75،پی کے 63 اور پی پی 51 میں ضمنی انتخابات ،الیکشن کمیشن نے حلقوں میں پولنگ سے متعلق شکایات کے لیے کنٹرول روم قائم کردیا الیکشن کمیشن کنٹرول روم میں شام 6 بجے تک شکایات موصول کی جائیں گی
