سیالکوٹ (باغی ٹی وی، سٹی رپورٹر مدثر رتو)سیالکوٹ اور گرد و نواح میں ہونے والی بارش نے گرمی کا زور توڑ دیا، جبکہ ٹھنڈی ہواؤں کے باعث موسم دلفریب ہو گیا۔ شہرِ اقبال کے علاقوں ڈسکہ، پسرور، سمبڑیال اور مضافات میں کہیں ہلکی اور کہیں تیز بارش نے موسم کو خوشگوار بنا دیا ہے، اور شہریوں کے چہروں پر خوشی جھلکنے لگی ہے۔
بارش کے باعث درجہ حرارت میں واضح کمی آئی ہے جبکہ بادلوں نے آسمان پر مکمل قبضہ جما رکھا ہے۔ شہریوں نے موسم کی تبدیلی کو سراہتے ہوئے کہا ہے کہ شدید گرمی کے بعد یہ بارش کسی نعمت سے کم نہیں۔
دوسری جانب محکمہ موسمیات نے پیشگوئی کی ہے کہ آج ملک کے بیشتر علاقوں میں مطلع جزوی طور پر ابرآلود رہے گا، جبکہ بالائی سندھ، خیبرپختونخوا، شمال مشرقی بلوچستان، کشمیر اور خطہ پوٹھوہار میں تیز ہواؤں اور گرج چمک کے ساتھ بارش کا امکان ہے۔ کئی علاقوں میں موسلادھار بارش اور ژالہ باری کی بھی توقع ظاہر کی گئی ہے۔
سیالکوٹ سمیت گوجرانوالہ، گجرات، نارووال، منڈی بہاؤالدین، جہلم، مری اور گلیات میں بھی گرج چمک کے ساتھ مزید بارشوں کی پیشگوئی کی گئی ہے، جس کے باعث شہریوں کو احتیاط برتنے کی ہدایت کی گئی ہے۔
ادھر سندھ کے بیشتر علاقوں میں موسم گرم اور خشک رہنے کا امکان ہے، تاہم عمرکوٹ، تھرپارکر، دادو اور لاڑکانہ میں بارش کی نوید ہے، جبکہ بلوچستان کے زیارت، کوئٹہ، خضدار اور دیگر علاقوں میں بھی بارش کی پیشگوئی ہے۔ کشمیر اور گلگت بلتستان میں بھی ابر آلود موسم اور ژالہ باری کا امکان ظاہر کیا گیا ہے۔
