خفی لفظوں سے لکھی درد کی تحریر ہوتی ہے
یہ عورت ہر طرح سے مرد کی جاگیر ہوتی ہے
آغا نیاز مگسی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دو بار صدارتی ایوارڈ حاصل کرنے والی پاکستان کی معروف ادیبہ،شاعرہ، افسانہ نویس اور کالم نگار محترمہ نیر رانی شفق صاحبہ 6 مارچ 1969 کو ڈیرہ غازی خان میں پیدا ہوئیں ۔ ۔وہ تین بہنیں اور چار بھائی تھے جن میں سے ایک بہن نرگس محبوب اور ایک بھائی ذوالفقار غازی صاحب کا انتقال ہو چکا ہے ۔
نرگس محبوب صاحبہ میجر راشد صاحب کی اہلیہ اور راول پنڈی ہائی اسکول میں ہوم اکنامکس کی ٹیچر تھیں جبکہ ذوالفقار غازی صاحب ایک معروف سیاسی و سماجی اور کاروباری شخصیت اور سابق سٹی کونسلر تھے ان کے بڑے بھائی منصور غازی صاحب سمال انڈسٹریز پنجاب کے ریجنل ڈائریکٹر کے عہدے سے سبکدوش ہوئے ہیں اور چھوٹے بھائی ارشد غازی ایک پرائیویٹ کمپنی میں اعلی عہدے پر فائز ہیں ان کی ایک بہن نیلوفر صاحبہ ڈیرہ غازی خان کی معروف سیاسی و سماجی شخصیت محمد اظہر ثاقب صاحب کی شریک حیات ہیں ۔
نیر رانی شفق صاحبہ کے والد صاحب کا نام محبوب الاہی اور خاوند محترم کا نام مختار بلوچ ہے جو کہ سوشل سیکوریٹی آفیسر ہیں اور ماشاء اللہ یہ 3خوب صورت بچوں کے باپ ہیں۔ جبکہ خود نیر رانی صاحبہ ڈویژنل پبلک اسکول اینڈ کالج ڈیرہ غازی خان میں بحیثیت لیکچرر اپنے فرائض سر انجام دے رہی ہیں ۔
ان کی اب تک 7 کتابیں شائع ہو چکی ہیں جن میں 1۔ وطن خوشبو (صدارتی ایوارڈ )2۔ ضیائے وطن (صدارتی ایوارڈ )3۔ کھٹے میاں میٹھے میاں ( بچوں کی کہانیوں پر مشتمل ) 4۔ شفق رنگ کہانیاں ( افسانے اور ناولٹ) 5 ۔ شفق رنگ تقاریر۔ 6 شفق رنگ مضامین ( ادبی مضامین اور انشائیے 7 ۔ شنگرفی شام کے دکھ ( شعری مجموعہ ) ۔
نیر رانی صاحبہ نے "آنچل” کے نام سے ایک علمی اور ادبی تنظیم کا قیام عمل میں لایا۔ ڈیرہ غازی خان میں پہلی بار (آنچل) کے پلیٹ فارم پر خواتین کو یکجا کیا اور اس تنظیم کے زیر اہتمام بے شمار مشاعرے و دیگر علمی اور ادبی تقریبات کا انعقاد کیا بعد ازاں انہوں نے ” دریچہ”_ کے نام سے ایک اور تنظیم کی بنیاد ڈالی ۔ ان کی شاعری میں امید، خواہش ، دکھ ،درد، اورجذبہ حب الوطنی کا اظہار ہوتا ہے اور یہ بھی کہ وہ غم دوراں ، غم روزگار اور غم جاناں کی شاعرہ کے طور پر سامنے آتی ہیں ۔ غم دوراں یا ملکی حالات کی عکاسی ان کی شاعری سے اس طرح ہوتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کیسے کوئی بات کرے اب تعزیریریں ہیں سوچوں پر
امن کو یوں محکوم کیا
حاکم نے لب سلوائے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاشے گرے زمیں پر تو اختر بھی رو پڑے
اب کے تو میرے شہر کے پتھر بھی رو پڑے
ٹوٹی ہیں کن سہاگنوں کی حیف چوڑیاں
ماوٴں کی گود اجڑی مقدر بھی رو پڑے
دریا ندیوں اور جھیلوں سے
بس اپنا رزق کماتے ہیں
بس تان کے "شفق” کی چادر
سر ساحل ہی سو جاتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نیر رانی شفق صاحبہ نے اپنی شاعری میں خواتین کی بہترین انداز میں نمائندگی اور ان کے جذبات کی بھرپور ترجمانی کی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
کبھی شوہر کے آنگن میں کبھی بے گور اسیری میں
گزاری زیست ہم نے کاٹ کر اپنی زبانوں کو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پڑی ہے پائوں میں زنجیر رشتوں اور رواجوں کی
قفس میں قید والوں سے رضا کی بات مت کرنا
یہی ہے رہبری تو رہزنی پھر کس کو کہتے ہیں
جو سب کچھ لوٹ لے اس رہنما کی بات مات کرنا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خفی لفظوں سے لکھی درد کی تحریر ہوتی ہے
یہ عورت ہر طرح سے مرد کی جاگیر ہوتی ہے
وہ جس کی آنکھ میں محرومیاں بستی ہیں صدیوں سے
وہ خود کتنے ہی رشتوں کی مگر زنجیر ہوتی ہے
نکل کر خلد سے بھی تو زمیں کوئی نہیں اس کی
زمیں زادی کی بھی دیکھو عجب تقدیر ہوتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
عید جیسے پرمست تہوار کی مناسبت سے وہ اپنی سکھیوں اور سہیلیوں کو کچھ اس طرح یاد کرتی ہیں ۔
۔۔۔۔۔۔۔۔۔۔۔۔۔۔۔۔
تحفہ عید سکھی تجھ کو نرالہ بھیجوں
بہر تزئین گلو چاند کا ہالہ بھیجوں
چوڑیاں کانچ کی اور کلیوں کے گجرے لے کر
وہی کنگن وہی پائل گل و لالہ بھیجوں
میں نے جھولی تھیں ترے سنگ جو پینگیں برسوں
ساتھ پینگوں کے شرارت کا حوالہ بھیجوں
دستکیں دیتا ہے بچپن کا زمانہ دل پر
وہ کھلونے وہی گڑیا وہی مالا بھیجوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نیر رانی صاحبہ اپنی قلبی واردات کا اظہار بھی نہایت خوب صورتی کے ساتھ کرتی ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تو مری آنکھ کے دریا کو حیرت سے نہ دیکھ
سبھی دریاؤں کو لگتے ہیں سمندر اچھے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔،۔۔۔۔۔۔۔۔۔
اس کی پرشوق نگاہوں سے سجا کرتی تھی
وہ گیا ہے تو کبھی خود کو سنوارا بھی نہیں
اجڑے ہیں کیسے کوچہ و بازار مصر کے
یوسف کا آج کوئی خریدار بھی نہیں
نیند ظالم تھی کہ روٹھی رہی شب بھر مجھ سے
چاندنی رات میں وہ بھی کہاں سویا ہوگا
کبھی فصل گل کا حسیں سماں کبھی سردیوں کی اداس شب
تھیں محبتوں پہ جوانیاں مرے ہمسفر مرے ہم نفس
کبھی رات بھر یونہی جاگنا کبھی چونکنا یونہی بے سبب
تھیں وہ خوب تر پریشانیاں مرے ہمسفر مرے ہم نفس
