قصور میں دن دیہاڑے ڈکیتی، پولیس کی کارکردگی پر سوالات،شہریوں کا احتجاج

قصور (باغی ٹی وی،بیورو رپورٹ):قصور کے تھانہ بی ڈویژن میں دن دیہاڑے ایک کریانہ اسٹور پر ڈکیتی کی واردات نے علاقے میں خوف و ہراس پھیلا دیا ہے۔ پولیس کی کارکردگی پر بھی سوالات اٹھ رہے ہیں۔

تفصیلات کے مطابق، آج مورخہ 13 اگست 2024 کو دو ڈاکوؤں نے کوٹ غلام محمد میں واقع ایک کریانہ اسٹور پر حملہ کر دیا۔ ڈاکوؤں نے دکاندار محمد منیر کو اسلحہ کے زور پر گھیر کر تقریباً 18 سے 19 ہزار روپے نقد اور ایک قیمتی موبائل فون چھین لیا اور فرار ہو گئے۔

واقعہ کی اطلاع ملتے ہی پولیس موقع پر پہنچی اور ابتدائی کارروائی کرتے ہوئے ایک مقدمہ درج کر لیا۔ تاہم، شہریوں نے بڑھتی ہوئی وارداتوں پر تشویش کا اظہار کرتے ہوئے پولیس سے ملزمان کو جلد از جلد گرفتار کرنے کا مطالبہ کیا ہے۔

شہریوں کا کہنا ہے کہ دن دیہاڑے اس طرح کی وارداتیں علاقے میں قانون و نظم کی صورتحال کی سنگینی کو ظاہر کرتی ہیں۔ وہ پولیس سے مطالبہ کرتے ہیں کہ وہ اپنی گشت کو بڑھا کر علاقے میں امن و امان قائم کرے۔