میئر کراچی مرتضیٰ وہاب نے پنجاب حکومت پر تنقید کرتے ہوئے کہا ہے کہ وزیر اعلیٰ پنجاب کہیں گئی نہیں لیکن پنجاب صاف ستھرا نظر آ رہا ہے، یہ ایک اچھی مثال ہے۔
کراچی میں پریس کانفرنس کرتے ہوئے میئر کراچی نے ایم کیو ایم پاکستان اور جماعت اسلامی کو بھی شدید تنقید کا نشانہ بنایا۔ مرتضیٰ وہاب کا کہنا تھا کہ تنقید کرنے والوں کا اصل کام کھالیں جمع کرنا ہے، طنزیہ انداز میں کہا کہ بہت کھالیں اٹھا لیں، اب آلائشیں بھی اٹھا لیں۔
انہوں نے کہا کہ کراچی کی موجودہ حالت سب کے سامنے ہے، جو کچھ ایم کیو ایم نے اس شہر کے ساتھ کیا وہ کسی سے چھپا نہیں۔ ہماری کوشش ہے کہ شہر کے نظام میں بہتری لائی جائے، کل سے مختلف علاقوں کے دورے کر رہا ہوں، نظام کبھی مکمل طور پر آئیڈیل نہیں ہوتا لیکن بہتری کی گنجائش ہمیشہ موجود رہتی ہے۔
مرتضیٰ وہاب نے مزید بتایا کہ کراچی کے تمام اضلاع اور ٹاؤنز میں کلیکشن پوائنٹس قائم کیے گئے ہیں، بڑی شاہراہوں کو دھونے کا فیصلہ بھی کیا گیا ہے جس کا آغاز برنس روڈ سے کیا گیا۔ اب تک شہر بھر سے 37 ہزار 547 ٹن آلائشیں اٹھائی جا چکی ہیں۔
ایک سوال کے جواب میں انہوں نے کہا کہ وزیر اعلیٰ پنجاب کہیں گئی نہیں ہیں، لیکن ان کی موجودگی میں پنجاب صاف نظر آ رہا ہے، جو قابلِ تحسین عمل ہے۔
وزیر اعظم شہباز شریف کا ترک صدر کو فون، عید الاضحیٰ کی مبارکباد دی