صدر مملکت سے ملاقات میں ملکہ میکسیما نے کس کی تعریف کی؟
باغی ٹی وی کی رپورٹ کے مطابق صدر مملکت ڈاکٹر عارف علوی سے ہالینڈ کی ملکہ اور غریب و نادار طبقات کی مالی معاونت کے لیے اقوام متحدہ کے سیکرٹری جنرل کی خصوصی نمائندہ ملکہ میکسیما نے ملاقات کی۔ صدرمملکت نے نادار طبقات کی مالی معاونت کے لئے ان کی کاوشوں کو سراہا۔
ایوان صدر میڈیا آفس سے جاری بیان کے مطابق صدر مملکت نے کہا کہ پاکستان نے مالی معاونت میں نمایاں پیش رفت کی ہے، اس دورے سے جاری اقدامات پر مثبت اثرات مرتب ہوں گے۔ صدر مملکت نے ملکہ میکسیما کو 2023 تک ملک میں مالی معاونت خاص طور پر خواتین کی مالی معاونت کو مزید فروغ دینے کے لئے نیشنل فنانشل انکلوزن سٹریٹجی کے تحت اٹھائے جانے والے اقدامات سے آگاہ کیا۔ انہوں نے کہا کہ پاکستان پائیدار ترقی کے اہداف کے حصول کیلئے مالی معاونت کو ایک موثر ذریعہ سمجھتا ہے۔ ملکہ میکسیما نے صدرمملکت کو اسلام آباد میں اپنی مصروفیات سے آگاہ کیا۔ ملکہ میکسیما نے پاکستان کی نادار طبقات اور خاص طور پر خواتین کی مالی معاونت کے سلسلے میں کی جانے والی کوششوں کی تعریف کی.
خواتین کو بااختیار بنانے کے لئے کیا کرنا ہو گا؟ وزیراعظم کی موجودگی میں ملکہ میکسیما کی تجویز
قبل ازیں وزیر اعظم عمران خان سے ہالینڈ کی ملکہ میکسیما نے اقوام متحدہ کے سکرٹری جنرل کی ترقی کے بارے میں مالیاتی شمولیت کے بارے میں خصوصی نمائندہ کی حیثیت سے وزیر اعظم آفس میں ملاقات کی۔ وزیر اعظم نے ترقی میں مالیاتی شمولیت کے فروغ پر ان کی تعریف کی۔ انہوں نے کہا کہ ان کے دورہ پاکستان سے مالیاتی شمولیت کے فروغ کے لئے حکومت کی جاری کوششوں کو مزید تقویت ملے گی
نیدر لینڈ کی ملکہ میکسما کی پاکستان آمد، کس نے کیا استقبال؟
۔وزیر اعظم نے ملکہ میکسیما کو حکومت کی جانب سے فلیگ شپ ”احسان پروگرام“ سمیت مختلف فلاحی اقدامات سے بھی آگاہ کیا۔ انہوں نے مزید کہا کہ ان اقدامات کا مقصد خاص طور پر خواتین اور نوجوانوں کے لئے معاشی شمولیت کو فروغ دینا ہے جس کا بنیادی مقصد غربت کا خاتمہ، معاشی ترقی اور خواتین کو بااختیار بنانا ہے۔ ملکہ میکسیما نے وزیر اعظم عمران خان کی سربراہی میں ملک میں مالیاتی شمولیت کو فروغ دینے کے لئے پاکستان کی کوششوں کو سراہا اور غربت کے خاتمے اور جامع معاشی ترقی کے لئے پاکستان کی جدوجہد کی حمایت کا اعادہ کیا۔ وزیر اعظم عمران خان کی مالی اعانت کے لئے خواتین تک رسائی کو ترجیح دینے اور حکومتی ادائیگیوں اور طریقہ کار کو ڈیجیٹائز کرنے کی کوششوں کی تعریف کرتے ہوئے ملکہ نے مالیاتی شراکت کو فروغ دینے کی ضرورت پر زور دیا
