پاکستان تحریک انصاف کی رہنما صنم جاوید کو سرگودھا جیل کے باہر سے گرفتار کرلیا گیا۔
باغی ٹی وی : پولیس ذرائع کے مطابق صنم جاوید کو سرگودھا جیل سے رہا ہو کر باہر نکلنے پر گرفتار کیاگیا،صنم جاوید گوجرانوالا کینٹ پولیس کو 9 مئی کے مقدمے میں مطلوب ہیں،پی ٹی آئی رہنما عالیہ حمزہ بھی گوجرانوالا پولیس کو مقدمے میں مطلوب ہیں اور وہ بھی سرگودھا جیل سے آج ہی رہا ہو رہی ہیں، عالیہ حمزہ کی گرفتاری کےلیے بھی گوجرانوالا پولیس سرگودھاجیل کےباہرموجود ہے۔
قبل ازیں سرگودھا کی انسداد دہشت گردی کی خصوصی عدالت نے 9 مئی کےتین مقدمات میں پی ٹی آئی رہنما صنم جاوید اورعالیہ حمزہ کی ضما نت منظور کر لی تھی، دونوں رہنماوں کے خلاف 9 مئی کے حوالے سے میانوالی میں تین مقدمات درج تھے۔
انسداد دہشت گردی کی خصو صی عدالت نے تینوں مقدمات میں ضمانت منظور کی، جس کے بعد دونوں خواتین رہنماوں کے مچلکے جمع کرانے کے لیے کارروائی شروع کردی گئی،اسی طرح تھانہ موسی خیل میانوالی میں ایک مزید مقدمہ درج ہوا تھا جس میں عبوری ضما نت منظور کرلی گئی وکلا نے بتایا کہ مچلکے جمع کرائے جانے کے بعد جیل سے دونوں رہنماوں کی رہائی ممکن ہوگی۔
واضح رہے کہ گزشتہ ہفتے سانحہ 9 مئی کی تحقیقات کے لیے جے آئی ٹی گوجرانوالہ کو سرگودھا جیل میں قید صنم جاوید اور عالیہ حمزہ سے تفتیش کی اجازت دی گئی تھی، انسداد دہشتگردی عدالت میں گوجرانوالہ میں 9 مئی کو توڑ پھوڑ کے مقدمہ کی سماعت کے دوران جے آئی ٹی کی جانب سےاستدعا کی گئی تھی کہ صنم جاوید اور عالیہ حمزہ سے تفتیش کرنے کی اجازت دی جائے،درخواست میں مؤقف اختیا ر کیا گیا تھا کہ صنم جاوید اور عالیہ حمزہ سرگودھا جیل میں ہیں، جے آئی ٹی کی درخواست میں ایف آئی اے کے ایک لیٹر اور سول میڈیا ویڈیوز کا حوالہ بھی دیا گیاتھا عدا لت نے جے آئی ٹی کو دونوں ملزمہ سے سرگودھا جیل میں تفتیش کرنے کی اجازت دی تھی۔
