ڈسٹرکٹ اینڈ سیشن کورٹس اسلام آباد میں سابق وزیرِاعظم آزاد کشمیر سردار تنویر الیاس کے خلاف ڈپلومیٹک پاسپورٹ کیس کی سماعت ہوئی، جس میں عدالت نے ان کے وارنٹِ گرفتاری جاری کر دیے۔
تفصیلات کے مطابق، جوڈیشل مجسٹریٹ احمد شہزاد گوندل نے کیس کی سماعت کی۔ دورانِ سماعت سردار تنویر الیاس کی جانب سے حاضری سے استثنیٰ کی درخواست دائر کی گئی تھی، تاہم عدالت نے یہ درخواست مسترد کر دی اور حکم دیا کہ ملزم کو گرفتار کر کے آئندہ سماعت پر عدالت میں پیش کیا جائے۔ذرائع کے مطابق، سردار تنویر الیاس کے خلاف وفاقی تحقیقاتی ادارے (ایف آئی اے) نے مقدمہ درج کر رکھا ہے، جس میں ان پر ڈپلومیٹک پاسپورٹ کے غیر قانونی استعمال اور اختیارات کے ناجائز استعمال کا الزام عائد کیا گیا ہے۔عدالت نے کیس کی مزید سماعت 24 نومبر 2025 تک ملتوی کرتے ہوئے ایف آئی اے کو ملزم کی گرفتاری یقینی بنانے کی ہدایت دی ہے۔
