سابق وزیر خزانہ سرتاج عزیز انتقال کر گئے

لاہور: مسلم لیگ ن کے رہنما سابق وزیر خزانہ سرتاج عزیز انتقال کر گئے۔

باغی ٹی وی : مسلم لیگ ن کے رہنما احسن اقبال نےایکس پر ٹوئٹ میں سرتاج عزیز کے انتقال کی تصدیق کی انہوں نے کہا کہ سرتاج عزیز تحریک پاکستان کے کارکن اور قوم کا عظیم اثاثہ تھے، قوم کیلئے ان کی خدمات کو ہمیشہ یاد رکھا جائے گا مجھے ان کے ساتھ کام کرنے کا اعزاز حاصل ہوا اور میں ان کے پیار اور رہنمائی کو کبھی نہیں بھولوں گا۔

سرتاج عزیز 7 فروری 1929 میں پیدا ہوئے، انہوں نے تحریک پاکستان میں حصہ لیا 1950 میں سول سروس میں شمولیت اختیار کی۔ سرتاج عزیز نے ہارورڈ یونیورسٹی سے معاشیات میں ماسٹرز کیا،1949ء میں پنجاب یونیورسٹی سے اقتصادیات کے شعبے میں ڈگری حاصل کی انہوں نے 1950ء میں حکومتی ملازمت اختیار کی اور مختلف عہدوں پر کام کیا۔ 1967ء میں پلاننگ کمیشن میں جوائنٹ سیکرٹری کی حیثیت سے فرائض سر انجام دیے۔

سرتاج عزیز کو بین الاقوامی ممتاز عہدوں پر بھی رہنے کا موقع ملا ۔1971ء سے 1984ء تک اقوام متحدہ، ورلڈ فوڈ کونسل، انٹرنیشنل فنڈ فار ایگریکلچر ڈویلپمنٹ اور دیگر اداروں میں کام کیا سرتاج عزیز نے 1984ء میں وطن واپسی پر پاکستانی سیاست میں حصہ لیا اور وزیر مملکت برائے خوراک و زراعت کی حیثیت سے وفاقی کابینہ میں شامل ہوئے۔

وہ 1985ء اور 1994ء میں‌ خیبر پختونخوا سے سینیٹر منتخب ہوئے۔ اکتوبر1985ء میں وزیراعظم کے خوراک و زراعت کے خصوصی مشیر اور جنوری 1986ء میں وفاقی وزیر خوراک ،زراعت و دیہی ترقی کے عہدے پر فائز ہوئے۔ اگست 1990ء سے جولائی 1993ء تک وفاقی وزیر خزانہ، منصوبہ بندی و معاشی امور کے وزیر بھی رہے ۔

جولائی 1993ء ہی میں پاکستان مسلم لیگ (ن) کے سیکرٹری جنرل منتخب ہوئے۔ 1998ء سے 1999ء تک اس وقت کے وزیر اعظم نواز شریف کی کابینہ میں وزیر خارجہ جیسے اہم منصب پر فائز رہے سرتاج عزیز سینیٹ کی خارجہ، کشمیر و شمالی علاقہ جات کے امور کے علاوہ خزانہ ، معاشی امور اور خوراک و زراعت کی قائمہ کمیٹیوں کے چیئرمین بھی رہے ۔