سعودی عرب کے شہر طائف میں پولیس نے مویشیوں کی چوری میں ملوث ایک بڑے گروہ کو گرفتار کر لیا ہے، جس میں 13 پاکستانی شہری شامل ہیں۔
سعودی میڈیا کے مطابق یہ تمام افراد بھیڑوں کی چوری کی متعدد وارداتوں میں مطلوب تھے اور کافی عرصے سے قانون نافذ کرنے والے اداروں کی نگرانی میں تھے۔سعودی اخبار کی رپورٹ کے مطابق ملزمان مختلف علاقوں میں قائم مویشیوں کے باڑوں کو رات کی تاریکی میں نشانہ بناتے تھے اور چوری شدہ بھیڑوں کو خفیہ طریقے سے بیچ کر مالی فائدہ حاصل کرتے تھے۔ پولیس نے ایک منظم منصوبہ بندی کے تحت ان کی سرگرمیوں کی نگرانی کی، جس کے بعد چھاپے مار کر تمام 13 افراد کو حراست میں لے لیا گیا۔
حکام کے مطابق ابتدائی تفتیش میں یہ بات سامنے آئی ہے کہ ملزمان نہ صرف متعدد وارداتوں میں براہِ راست ملوث تھے بلکہ انہوں نے چوری شدہ مویشیوں کو منتقل کرنے کے لیے ایک باقاعدہ نیٹ ورک بھی قائم کر رکھا تھا۔پولیس نے تمام گرفتار افراد کو مکمل قانونی کارروائی کے بعد پراسیکیوشن کے حوالے کر دیا ہے جہاں ان کے خلاف مزید قانونی کارروائی کی جائے گی۔ سعودی حکام کا کہنا ہے کہ مویشی چوری کے بڑھتے واقعات کے بعد سیکیورٹی اداروں نے متعلقہ علاقوں میں گشت اور نگرانی مزید سخت کر دی ہے۔
