برسلز: چیئرمین کشمیر کونسل ای یو، علی رضا سید نے یورپی ہیڈکوارٹر برسلز میں شہدائے جموں کو خراج عقیدت پیش کرتے ہوئے کہا کہ جموں کے شہداء نے اپنی جانوں کا نذرانہ پیش کرکے قربانی کی عظیم مثال قائم کی اور پورے خطہ جموں و کشمیر میں جذبہ حریت کو بھرپور انداز میں اجاگر کیا۔ انہوں نے کہا کہ کشمیری شہداء کی قربانیاں آزادی کے لیے جدوجہد کرنے والے کشمیریوں کے لیے مشعل راہ ہیں، اور یہ جدوجہد 1947 سے آج تک جاری ہے۔یورپ میں کشمیر کونسل کے مرکزی سیکرٹریٹ میں ہونے والے اجلاس میں علی رضا سید کے علاوہ چوہدری خالد جوشی، راؤ مستجاب احمد اور سردار صدیق سمیت دیگر شخصیات نے بھی شرکت کی۔ مقررین نے مقبوضہ کشمیر میں بھارتی مظالم کی سخت مذمت کرتے ہوئے مطالبہ کیا کہ کشمیری اسیروں کو فوری رہا کیا جائے اور بھارتی فوجیں جموں و کشمیر سے انخلا کریں۔
علی رضا سید نے اپنے خطاب میں کہا کہ جموں کے شہداء سے لے کر آج تک تمام کشمیری شہداء نے اپنے خون سے تحریک آزادی کی آبیاری کی ہے اور ان کی قربانیاں کشمیریوں کے حوصلے کو مزید مضبوط کر رہی ہیں۔ انہوں نے مزید کہا کہ بھارتی مظالم سے کشمیریوں کے جذبہ حریت کو ختم نہیں کیا جا سکتا اور کشمیر کی تحریک آزادی کی تاریخ شہداء کے خون سے لکھی گئی ہے، جسے منطقی انجام تک پہنچانا ہمارا عزم ہے۔چیئرمین کشمیر کونسل ای یو نے عالمی برادری، اقوام متحدہ اور یورپی یونین سے مطالبہ کیا کہ وہ مقبوضہ کشمیر میں انسانی حقوق کی صورتحال کا نوٹس لیں اور مسئلہ کشمیر کے پرامن حل کے لیے مؤثر کردار ادا کریں۔ انہوں نے کہا کہ ہم بھارتی مظالم کو عالمی فورمز پر اجاگر کرتے رہیں گے اور مقبوضہ کشمیر کے مظلوم عوام کو انصاف دلانے کی کوششیں جاری رکھیں گے۔
علی رضا سید کا شہدائے جموں کو خراج عقیدت
Shares:
