بانی چیئرمین پی ٹی آئی عمران خان کی اہلیہ بشریٰ بی بی نے 190 ملین پاؤنڈز کیس میں سزا معطلی کی درخواست پر جلد سماعت کی درخواست اسلام آباد ہائی کورٹ میں دائر کر دی ہے۔
بشریٰ بی بی نے اپنی درخواست میں کہا کہ 25 مارچ کو سزا معطلی کا کیس سماعت کے لیے مقرر تھا تاہم اس روز مرکزی وکیل قتل کے مقدمے میں سپریم کورٹ میں مصروف تھے جس کی وجہ سے درخواست کی سماعت نہ ہو سکی۔ بشریٰ بی بی نے یہ بھی کہا کہ عدالت نے مختصر کاز لسٹ کی وجہ سے سزا معطلی کی درخواستیں عید کے بعد تک ملتوی کردیں۔بشریٰ بی بی کی جانب سے دائر کردہ درخواست میں مزید مؤقف اختیار کیا گیا کہ وہ 54 سالہ ہاؤس وائف ہیں اور سزا معطلی کی درخواست کو مرکزی اپیل کے ساتھ عید سے قبل سماعت کے لیے مقرر کیا جائے تاکہ مقدمے کی کارروائی میں تاخیر نہ ہو۔
درخواست میں بشریٰ بی بی نے وفاقی حکومت اور چیئرمین نیب کو فریق بنایا ہے۔ ان کا کہنا ہے کہ سزا کی معطلی سے متعلق ان کی درخواست کو جلد سماعت کے لیے مقرر کیا جائے تاکہ ان کے خلاف عدالتی کارروائی میں فوری انصاف مل سکے۔
