سیالکوٹ (باغی ٹی وی، ڈسٹرکٹ رپورٹر مدثر رتو)ڈپٹی کمشنر سیالکوٹ صبا اصغر علی نے گورنمنٹ پائلٹ سیکنڈری اسکول (سنٹر آف ایکسیلنس) میں منعقدہ سائنس فیئر 2025 میں بطور مہمانِ خصوصی شرکت کی۔ انہوں نے سائنس فیئر کا باقاعدہ افتتاح کیا اور طلباء و طالبات کی جانب سے تیار کردہ کیمسٹری، فزکس اور بائیولوجی کے پراجیکٹس کا تفصیلی معائنہ کیا۔
اس موقع پر ڈپٹی کمشنر صبا اصغر علی نے طلباء سے گفتگو کرتے ہوئے کہا کہ سائنس اور ٹیکنالوجی میں مہارت حاصل کرنا وقت کی سب سے بڑی ضرورت ہے۔ نوجوان نسل میں تحقیق، جستجو اور ایجادات کا جذبہ ہی قوموں کو ترقی کی نئی راہوں پر گامزن کرتا ہے۔ انہوں نے کہا کہ تعلیمی اداروں میں اس نوعیت کی سرگرمیاں نہ صرف طلباء کی صلاحیتوں کو نکھارتی ہیں بلکہ ان میں اعتماد اور عملی سوچ کو بھی فروغ دیتی ہیں۔ ڈپٹی کمشنر نے مزید کہا کہ ضلعی انتظامیہ ایسے تعلیمی پروگراموں کی بھرپور سرپرستی جاری رکھے گی تاکہ سیالکوٹ کے طلباء ملک بھر میں اپنی علمی برتری برقرار رکھ سکیں۔
تقریب میں پرنسپل شہباز حسن، پروفیسر رانا ظفر اقبال، اراکین بورڈ آف گورننس دانش سکول اعجاز غوری، میڈم زیبا ظہور، میڈم ارم شیرازی، محمد عمران خان لودھی، چوہدری شکیل احمد، ڈائریکٹر ایئرپورٹ سیالکوٹ میاں عتیق، مرزا شکور صاحب، نعمان طیب (وائس پرنسپل سی او ای بوائز)، حسنین عسکری (پروگرام آرگنائزر)، سلمان شیخ (وائس پریذیڈنٹ سیالکوٹ چیمبر آف کامرس)، اور پروفیسر قاسم (پرنسپل گورنمنٹ ہائر سیکنڈری اسکول نمبر 2، سیالکوٹ) سمیت معزز شخصیات نے شرکت کی۔
تقریب کے اختتام پر ڈپٹی کمشنر صبا اصغر علی نے نمایاں کارکردگی دکھانے والے طلباء میں تعریفی اسناد تقسیم کیں اور ان کے جذبے کو سراہا۔
