اوکاڑہ (نامہ نگار ملک ظفر)وائس چانسلر یونیورسٹی آف اوکاڑہ پروفیسر ڈاکٹر سجاد مبین کی زیر نگرانی سیرت النبی ﷺ سیمینار کا انعقاد کیا گیا۔ شعبہ علوم اسلامیہ کے پروفیسرز نے بامقصد اور روح پرور سیمینار میں حضور اکرم ﷺ کی سیرتِ طیبہ کی روشنی میں صبر و استقامت کی اہمیت کو اجاگر کیا۔
سیمینار میں اساتذہ کرام، طلبہ و طالبات، علما اور مختلف شعبہ جات سے تعلق رکھنے والے افراد کی بڑی تعداد نے شرکت کی۔ وائس چانسلر پروفیسر ڈاکٹر سجاد مبین نے خطاب کرتے ہوئے کہا کہ نبی کریم ﷺ کی زندگی صبر، برداشت اور ثابت قدمی کا کامل نمونہ ہے۔ مکی دور کی مشکلات ہوں یا مدنی دور کے چیلنجز، آپ ﷺ نے ہر مرحلے پر صبر و استقامت کے ذریعے اسلامی تعلیمات کو فروغ دیا اور امت کے لیے بہترین عملی مثال قائم کی۔
دیگر مقررین نے کہا کہ نوجوان اگر سیرتِ رسول ﷺ کو اپنی عملی زندگی کا حصہ بنائیں تو معاشرے میں برداشت، رواداری اور باہمی احترام کو فروغ دے سکتے ہیں۔ ان کا کہنا تھا کہ صبر نہ صرف فرد کی شخصیت کو مضبوط بناتا ہے، بلکہ یہ معاشرتی استحکام اور قومی ترقی کی بنیاد بھی ہے۔
سیمینار کے اختتام پر سوال و جواب کا سیشن منعقد ہوا، جس میں یونیورسٹی کے طلبہ و طالبات نے اپنے خیالات کا اظہار کیا۔
