بیجنگ: سندھ کے سینئر وزیر ،وزیر اطلاعات و نشریات شرجیل انعام میمن نے چین میں ای وی بس مینوفیکچرنگ کمپنی سے ملاقات کی اور انہیں کراچی میں ای وی بس مینوفیکچرنگ پلانٹ قائم کرنے کی باضابطہ دعوت دی۔
اس ملاقات میں صوبائی وزیر برائے توانائی و منصوبہ بندی و ترقی، سید ناصر حسین شاہ بھی موجود تھے۔شرجیل انعام میمن نے اس موقع پر سندھ حکومت کی جانب سے گرین انرجی اور الیکٹرک موبلٹی کو فروغ دینے کے لئے مکمل تعاون کی یقین دہانی کرائی۔ انہوں نے کہا کہ حکومت سندھ سرمایہ کاروں کو ہر ممکن سہولت فراہم کرے گی، جن میں ٹیکس میں رعایت، زمین کی فراہمی اور ریگولیٹری منظوری کے عمل کو آسان بنانا شامل ہے۔شرجیل میمن کا کہنا تھاکہ حکومت سندھ کا مقصد پبلک ٹرانسپورٹ کو جدید خطوط پر استوار کرنا اور کاربن کے اخراج میں کمی لانا ہے۔ انہوں نے اس عزم کا اظہار کیا کہ ای وی بس پلانٹ کے قیام سے نہ صرف روزگار کے نئے مواقع پیدا ہوں گے بلکہ کراچی میں ایک صاف اور مؤثر ٹرانسپورٹ نظام کی جانب منتقلی بھی تیز ہو جائے گی۔
چینی کمپنی کے نمائندوں نے سینئر وزیر کی دعوت کا خیرمقدم کرتے ہوئے کراچی میں سرمایہ کاری کے ممکنہ مواقع کا جائزہ لینے میں دلچسپی ظاہر کی۔ اس کے علاوہ، چینی سرمایہ کاروں کی جانب سے اس منصوبے کی معاشی اور تکنیکی حیثیت کا جائزہ لینے کے لیے ایک فزیبلٹی اسٹڈی جلد شروع کرنے کی یقین دہانی کرائی گئی۔
اس منصوبے کے تحت سندھ میں نہ صرف الیکٹرک بسوں کی مینوفیکچرنگ کی جائے گی بلکہ یہ اقدام صوبے کی ماحولیاتی پالیسی کے مطابق ہے جو کاربن کے اخراج کو کم کرنے اور صاف توانائی کے ذرائع کو فروغ دینے پر مرکوز ہے۔
وزیراعظم کی مظفر آباد میں حریت کانفرنس کے رہنماؤں سے ملاقات
سی آئی اے سب انسپکٹر کی گاڑی پر فائرنگ،سب انسپکٹر سمیت دو افراد جاں بحق ایک زخمی
